Minister Dangui Oduber: EX EDIFICIO DI DOW TA PROYECTA PA SER CONVERTI DEN KANTOOR DI APA Y UN VISITOR INFORMACION CENTER
ORANJESTAD – Diahuebs mainta Minister di Turismo y Salud Publico sr. Dangui Oduber a tene un conferencia di prensa caminda e mandatario a anuncia un otro bunita proyecto cu su Ministerio ta ocupa cu ne. Esaki ta e proyecto di e ex edificio di DOW cu ya pa 15 aña ta bandona y ta un bista menos agradabel pa nos bishitantenan crusero. Ya caba pa algun tempo Gobierno a cuminsa haci su debido diligencianan pa asina explora e posibilidadnan pa Aruba Ports Authority (APA) tuma e edificio aki over, teniendo na cuenta cu pronto lo cuminsa e desaroyonan di Port City, a base di cual APA lo tin pa muda for di su edificio actual.
Minister Oduber a splica cu e idea ta pa APA tuma e edificio di DOW over, renoba esaki completo. Como esaki ta un edificio basta grandi ta bay comparti e edificio di manera cu e piso 2 ta bira oficinanan di APA. Aruba Tourism Authority (ATA) ta bay bay huur piso 1 di e edificio aki y lo bay converti e piso aki den un Visitor Information Center (VIC) pa brinda informacion na nos bishitantenan.
E VIC lo ta bon ubica di manera cu nos turistanan crusero por yega facil na dje. Minister Oduber a menciona cu esaki lo bay bira uno centro super moderno y luhoso. E VIC lo brinda tur informacion di kiko tur tin di haci na Aruba, kiko ta tur e actividadnan, nos mihor beachnan, lista di restaurant y kiko nan ta ofrece, nightlife, transporte y mucho mas. E lo sirbi como un guia pa e turista asina cu e baha di e barco crusero.
Bisando tur esaki Minister Oduber a presenta su plan na Conseho di Minister di cual esaki a keda aproba. Pronto e motibonan en conexion cu e traspaso di e edificio di DOW pa APA lo wordo publica den corant y riba website di Gobierno cu detayes. Despues cu esaki keda publica lo observa un periodo di 20 dia y lo por bay over e ora na haci un ceremonia oficial caminda lo bay firma un MOU entre Ministerio di Turismo, Gobierno di Aruba, APA, ATA, Stichting Monumentenfonds Aruba y Monumenten Bureau.
Finalmente Minister Dangui Oduber ta spera cu tur esaki por wordo concretisa e aña aki ainda pa asina e renobacion por cuminsa pa APA por tin un kantoor nobo y Aruba por tin su centro di informacion pa turistanan super modern cu nos tur por ta orguyoso di dje.
