GOBIERNO A BAY DEN CASACION Riba e topico di matrimonio di mesun sexo

E LEY TA CANANDO SU CAMINDA DEN PARLAMENTO

Despues di a ricibi e veredicto dia 6 di december 2022 den e caso di matrimonio di pareha di mesun sexo, Gobierno a busca conseho prome cu dicidi di apela, e asina yama “cassatie advies”. Den esaki ta recomenda pa apela e punto cu Corte a bay sinta riba stoel di Gobierno. Pa loke ta trata e punto cu si exclui parehanan di mesun sexo di matrimonio ta discriminacion, e conseho ta pa no apela, pasobra e constitucion di Aruba no ta permiti e tipo di discriminacion aki, ni nungun discriminacion.

A base di esaki Gobierno di Aruba a tuma e decision di bay den casacion contra e punto cu Corte a bay sinta riba e stoel di un gobierno. Ta importante pa haya claridad si e forma con Corte a duna contenido na e “rechtsvormende taak”, ta corecto.

E no tabata un decision facil. E cambio di ley pa permiti matrimonio di pareha di mesun sexo, ta den un proceso di legislacion avansa den Parlamento, cu e ley di iniciativa di partidonan Accion 21 – Raiz – Mas, y e tratamento di e ley ta den man di Parlamento.