MIKE EMAN CU BENNY SEVINGER A BRIYA CU NAN AUSENCIA DEN REUNION DI PARLAMENTO

Acaso ta pa motibo cu dialuna Benny Sevinger ta dilanti mesa berde pa e caso mas grandi di corupcion cu tereno di pueblo den historia di Aruba

E DI 2 CASO MAS GRANDI DI CORUPCION DI AVP
E gran pregunta cu ta surgi ta pakico?! Ta pasobra nan no tabatin cara pa presenta den e instituto mas halto di nos Pais sabiendo cu dialuna Benny Sevinger ta dilanti mesa berde pa e caso mas grandi di corupcion cu tereno di pueblo den historia di Aruba? Den historia di AVP esaki ta e di dos caso mas grandi di corupcion pasobra esun di Paul Croes cu mientras tanto ta condena dos biaha caba, ta esun di mas grandi den e historia recien di partido AVP.

Pa bin cu un ‘smokescreen’ pa tapa locual dialuna ta bay pasa na Corte, coalicion di AVP, MAS y ACC21 a haya gana di trece dilanti e caso di Endy Croes kende AVP a persigui te na “morto” te ora cu e caso a explota den nan propio cara. Endy Croes a sali liber di tur acusacion y persecucion vil y baho di AVP te cu den casacion a duna Endy Croes e oportunidad pa por lanta un caso pa daño y perhuicio.

AVP, MAS, Y ACCION 21 TA DEFENDE CORUPCION
E voceronan di AVP, Miguel Mansur, Marisol Lopez Tromp y Gerlien Croes a dicidi di defende corupcion di e partido berde cu un actitud decepcionante den Parlamento. Hustamente esunnan cu a grita di lo kier bin cu un politica nobo, den parlamento a opta pa tira lodo riba un Minister di MEP, anto unicamente pa defende e corupcion di Benny Sevinger y nan partido AVP.

Mike Eman den campaña como Lider di AVP a haci yamada na tur hende pa vota pa Benny Sevinger apesar cu e ta deteni. Mike Eman mes a anuncia di lo vota pa e corupto Benny Sevinger, alegando cu ta culpa di MEP. A caso ta MEP a bende terenonan di nos pueblo? A caso ta MEP tabata pasa opcion di tereno pa Leoncita pa despues e por bende? A caso ta MEP tabata cobra mey miyon pa tereno? P’esey Mike Eman, cu por cierto tambe ta bou di investigacion pa un transferencia di 50 mil dollar cu el a haya riba su cuenta for di Roberto Rincon, no tabatin cara di presenta den Parlamento ayera. E lo mester ta muriendo di berguensa pa e moda cu e ta cabando cu e partido cu su abuelo a funda, cu por cierto tampoco tin un trayectoria dje bunita ey pa conta. P’esey e dicho: “De tal palo tal astilla”, of na Hulandes “Appel valt niet ver van de boom”.

Echo ta cu dialuna Aruba un biaha mas su cara ta bay pasa berguensa pa e caso di corupcion di mas grandi den historia di Aruba unda cu Benny Sevinger y AVP a bende tereno di pueblo pa sumanan miyonario como sifuera ta nan propiedad e terenonan ey tabata.

Pero awe pa un yiu di tera, no tin tereno mas, danki na negoshi y corupcion 8 aña largo di AVP y Benny Sevinger.