PROME MINISTER EVELYN WEVER – CROES A BISHITA NOS GRANDINAN NA CAS DI CUIDO JABURIBARI

‘Pabien y danki pa crea e Aruba cu awe nos ta gosa di dje’

ORANJESTAD – Den cuadro di “Dia Internacional di Hende Muhe”, Prome Minister Evelyn Wever – Croes ta haciendo diferente bishita na organisacionnan y instancianan rond Aruba. Recientemente Prome Minister a realisa un bishita na Jaburibari na Stichting Thuiszorg Aruba, caminda a combersa cu e habitantenan y e trahadonan y a gradicinan pa e trabou grandi cu nan ta haci.

Henter e ekipo di trahado na e cas di cuido ta consisti di hende muhe. E trabou cu e hende muhenan aki ta haci ta asina grandi y importante  cu e ta dificil pa pone un balor na dje. Prome Minister Wever – Croes den nomber di Gobierno di Aruba y henter Aruba, a gradicinan pa e trabou cu nan ta eherce.

Despues di Covid hopi cos a cambia na Aruba y e cas di cuido tambe a sinti esey. Aworaki tin menos voluntario ta bishita e grandinan, mientras cu antes tabatin voluntarionan cu ta canta, resa y pasa tempo cu e grandinan.

Prome Minister Wever – Croes ta haci apelacion na henter Aruba pa si bo tin un tempo liber un rato, pa bishita e cas di cuido y pasa un rato agradabel y haci algun actividadnan cu nos grandinan, pa nan tambe por distrai nan mes.

‘Nos grandinan a duna hopi di nan bida pa Aruba y nan a construi e pais aki cu nos por lanta aden y lanta nos yiunan aden na paz, den trankilidad y cu libertad. Ban dunanan bek e Amor y cariño cu nan tin mester.’

Riba Dia Internacional di Hende Muhe, Prome Minister ta desea cada ser femenino specialmente nos grandinan, pabien y danki pa crea e Aruba aki cu awe nos ta gosa di dje.