Durante Conferencia di Prensa Minister Maduro a splica: A BRINDA AYUDO NA QREDITS PA POR SALBA 100 COMPANIA CHIKITO DEN PANDEMIA

Gobierno a tuma decision y a informa Parlamento debidamente

Durante conferencia di Prensa, Minister Maduro a splica riba e reunion publico pa formalisa e yudansa cu a wordo duna via Qredits durante pandemia na 100 negoshi chikito na Aruba.

Economia grandemente afecta pa e lock-down

E mandatario a bay bek den pasado recordando con dia 15 di maart 2020, e fronteranan di Aruba a wordo cera pa motibo di e pandemia. Esaki a trece Aruba su economia den un situacion hopi dificil pa e companianan mediano y chikito, cu ta representa 90% di nos economia. Comercio no tabata sa con lo bay haci y tabata preocupa con lo bay cumpli cu nan trahadornan y compromisonan di fin di luna. Yudansa tabata wordo pidi di tur caminda y na momento ey ya Gobierno tabata trahando riba e yudansa cu lo por wordo brinda na companianan chikito pa surpasa e efecto di pandemia. Na e momentonan ey Standard & Poors’ ta trece dilanti cu Aruba su economia lo ta esun cu mas lo wordo afecta y ta premira cu Aruba lo perde 44% di su economia debi na e lock-down, debi cu Aruba su economia ta draai riba turismo cual mundialmente a wordo afecta grandemente. Esey tabata e scenario cu nos Pais tabata aden na momento cu desicionnan mester a wordo tuma.

Peticion di Qredits pa yuda cu microcredito

Minister Maduro a splica cu Gobierno a haya un peticion dia 16 di april 2020 di Qredits pa nan por duna un microcredito special y hunto cune guia na companianan chikito y mediano pa nan surpasa e pandemia. E mandatario a evalua e peticion y a pidi Departamento Economico y Departamento di Finansa pa yuda pa asina por a brinda e ayudo aki na e companianan chikito via Qredits.

Ministernan a informa Parlamento di e yudansa ofreci

Dia 1 di juni 2020 Minister President y Minister Maduro a manda un carta pa informa Parlamento kico ta wordo haci pa yuda wanta e economia di Aruba durante e pandemia. E mandatario a splica cu a introduci Alivio Fiscal, FASE, Sosten Financiero pa kwartaal na companianan chikito y mediano, Loonsubsidie y un microcredito cu condicionnan atractivo via Qredits. Pa locual ta Qredits, na e momento eynan a splica Parlamento cu lo trata di un ayudo di 250 mil florin pa yuda cu microcredito na companianan chikito y mediano den e periodo di crisis. Mester corda cu na e momento ey Parlamento di Aruba no tabata tene reunion normal y  cu Gobierno tabata trahando cu skeleton crew. Pues no por a yama reunion pa pidi apoderacion adelanta, pero si a manda e carta cu splicacion di e yudansa bisando cu lo integra esaki den Presupuesto 2020 pa su aprobacion y despues pa su formalisacion. Parlamento a aproba Presupuesto 2020 unanimamente y hasta Parlamentarion Dowers, Wyatt-Ras y Lopez-Tromp cu awe ta cuestiona, e tempo ey a vota pro pa duna e yudansa via Qredits.

Si no a actua di biaha, awe e debate lo tabata otro

Minister Maduro a indica cu na momento di lock-down tur wowo tabata riba Gobierno, pendiente di ki yudansa Gobierno lo brinda. E mandatario a cuestiona cu si Gobierno no a brinda ayudo, ta kende otro lo mester a bay yuda e famianan cu a perde nan negoshi? Con nan lo a haci pa surpasa e momento dificil ey? Un cos ta sigur, si no a yuda, economia di Aruba lo a kibra y awe e debate lo tabata otro. Awe nos lo a tende cu Minister Maduro no a saca un man pa yuda y a laga 100 compania bati bancarota y mas di 100 famia keda sin entrada. IMF mes a raporta cu ta danki cu Gabinete Wever-Croes a actua di biaha, Aruba su economia y bida di hende a keda salba.

Ta traha semper den cuadra cu ley ta brinda

Na final di e conferencia di prensa, Minister Maduro a subraya cu Gobierno a traha na un manera responsabel y dentro di e cuadra cu ley ta brinda pa actua den momentonan excepcional manera un pandemia. Como Minister encarga cu Finansa y Asunto Economico e tempo eynan, a actua corecto, a evalua e cuadro di ley y a uza e espacio cu ley mes ta brinda pa actua durante un momento di crisis asina. Durante pandemia Minister Maduro no a perde cabes, pero a tuma decision y a informa Parlamento di Aruba debidamente. Pueblo por tin e trankilidad cu e mandatario ta haci un trabao responsabel pa Aruba por a enfrenta y awo surpasa e situacion financiero difícil cu e pandemia a hinca Pais Aruba aden.