Minister Rocco Tjon: INSTALACIONNAN PA MAS ILUMINACION DEN BARIO DI SAN NICOLAS A INICIA COMO PARTI DI E PROYECTO DI VEILIGE BARIOS

ORANJESTAD – Manera ta conoci, na januari Minister di Husticia y Asuntonan Social Sr. Rocco Tjon a reuni cu ambos DTI y Elmar, pa asina e proceso pa cambia e luznan di 28W pa 60W pa mas iluminacion den e bario di San Nicolas por cuminsa. Esaki ta parti di e proyecto multi-ministerial “Veilige Barios”, caminda hunto cu CEDE Aruba, ta bay percura pa eleva e siguridad den barionan pa henter comunidad, a traves di diferente programanan pa cu e centronan di bario, pero tambe a traves di miho iluminacion y camaranan di siguridad.

For di aña pasa a haya aprobacion di e presupuesto pa asina percura pa bin cu 113 punto di iluminacion adicional. Bisando esaki, e siman aki Elmar a cuminsa cu e proyecto aki, den e bario miho conoci como The Village. E importancia di cayanan bon ilumina no por ser subestima. E ta importante pa tin iluminacion adecuado, no solamente pa yuda combati criminalidad, pero tambe pa yuda peaton y conductor pa ta mas sigur riba nos careteranan. Cu e aumento di wattage, residentenan di San Nicolas por spera un miho nivel di iluminacion den nan bario.

Di parti di Ministerio di Husticia y Asuntonan Social, por bisa cu e proyecto aki tin un  prioridad halto, mirando cu pronto, nos lo wak barionan cu mucho mas luz, pa asina mitiga e riesgo di criminalidad of cualkier desgracia di trafico pa motibo di falta di lusamento. Di e manera aki nos ta un paso mas cerca den brinda siguridad na nos hobennan y comunidad henter, pero tambe brinda un miho calidad di bida na nos hobennan den e cuadro social.