Parlamentario Marco Berlis (MEP): Pabien na pueblo di Aruba cu e celebracion di 18 di maart
Celebracion di nos dia Nacional di Himno y Bandera!
E luna di Maart ta un di e lunanan di mas importante, ya cu den e luna aki Aruba ta celebra su dia Nacional di Himno y Bandera. Un dia cu nos ta conmemora e logro historico ora cu nos libertador Betico Croes a logra introduci na nos pais su propio himno y bandera. Betico Croes a logra pa nos Aruba haya nos propio Parlamento, nos propio moneda e florin, nos propio Algemene Rekenkamer y Raad van Advies. Tambe Betico Croes a logra cu nos lenguahe maternal Papiamento wordo reconoci. Betico Croes a dedica henter su bida pa lucha y duna Aruba su Status Aparte. E tabata un homber cu un gran vision y mision; “Aruba no por a sigui mas bao di a capa di Antiyas Hulandes y mester a bira un pais autonomo los for di Antiyas y cu un gobierno propio.”
E celebracion di 18 di Maart y e luna di Maart en general ta uno cu ta promove nos cultura, nos cumindanan crioyo, nos musica tipico y nos artesania local. Sin e esfuerso y determinacion di nos libertador Betico Croes hamas nos lo por a disfruta di esaki. Pesey, tabata bunita pa wak con pueblo a bishita den forma masal e celebracion aki na Plaza Libertador Betico Croes. Manera custumber, tabata tin e tentnan yen di nos dushi cumindanan crioyo, artesania local, t-shirts y otro cosnan bunita pa cumpra sin falta e cosnan dushi pa bebe. Esaki compaña pa musica tipico continuo di nos muchanan, hobenan y adultonan local, artistanan tur ta, pa deleita e publico presenta y esnan cu tabata sigui e eventonan via di e medionan social y television. Sin duda Aruba lo sa con pa celebra e luna aki y sigur lo sa di celebra un biaha mas dianan 17 y 18 di Maart proximo.
Desde akinan un caluroso pabien Aruba di nos dia nacional di Himno y Bandera, un fabuloso 18 di Maart. Gosa conscientemente y laga nos haci esaki di un forma sigur. Si bo bebe no stuur!
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!
