Parlamentario Darlaine Guedez-Erasmus (MEP): Contracto entre Pais Aruba y Lee Tofanelli Associates a wordo finalisa
Diahuebs 16 maart 2023 den sala di Parlamento di Aruba a trata e ley pa pidi autorisacion pa asina por firma y finalisa un acuerdo mutuo (contract) entre Pais Aruba y Lee Tofanelli y Associates (LTA).
Na aña 2002 ex Minister di Turismo sr. Briesen a firma un contract pa añanan 2002, 2003, 2004 y 2005 cu LTA na unda e ta bira LTA su tarea pa organisa e Famoso ‘Aruba Music Festival’. Cu sigur tabata hopi bon bishita pa localnan y vooral pa turistanan. Na 2004 Pais Aruba ta bolbe cera un contract cu LTA pa organisa Aruba Music Festival pa e añanan 2005, 2006, 2007 y 2008 mirando cu e festival tawata exitoso pa pais Aruba. Na aña 2008 Pais Aruba a bolbe cera un contract cu Aruba Music Festival pa e añanan 2010, 2011, 2012 y 2013. E ultimo contract aki no a bay un destaho publico pa e motibo cu Pais Aruba ya tin relacion cu LTA y a ricibi un ‘deal’ na beneficio di Pais Aruba. Ta importante pa menciona cu e accion aki ta un practica comun y no ta contra ley mirando cu e ley di comptabilidad mes ta stipula algun situacion cu por desvia di e proceso normal y a wordo concretisa den un Ministeriële Beschikking. Den e caso aki e accion ta legitimo y na 2016 Corte Comun ta confirma esaki.
Ban bek na aña 2009. Eleccion a tuma lugar y a bin un cambio di gobernacion. Aruba a haya un Minister nobo pa Turismo. Un investigacion a wordo inicia pa ex Minister Oduber aki, pa investiga si e ultimo contract ta valido of no. Na comienso di 2010 e ex Minister a informa LTA cu e no lo cumpli cu e contract y cu a base di e ley di comptabilidad e ta pone ex Minister Briesen para personalmente responsabel. LTA a hiba Pais Aruba corte den prome instancia y Pais Aruba a gana e caso. LTA a apela e sentencia y a gana e caso den Corte Comun. Aki 3 hues a dicta cu e contract di 2008 ta bon y no ta contra ley, esey kiermen cu e ta legitimo y ex Minister Oduber mester a sigui cu e contract. Despues, durante Gabinete Eman-II sr Oduber a retira y sr. Mike de Meza a tuma e cartera y el a wordo desconseha pa bay den casacion y aki negosacionnan a cuminsa pa yega na un acuerdo mutuo cu LTA di e suma di compensacion cu nan mester ricibi pa motibo cu no kier a cumpli cu e contract mas.
Den corto, esaki tawata e motibo pakico diahuebs 16 di maart Minister Dangui Oduber a bin Parlamento cu e ley, pa finalisa e acuerdo mutuo entre Pais Aruba y LTA y asina evita e debe cu Pais Aruba tin cu LTA sigui subi. Cu e reunion aki a finalisa un negosacion cu a cuminsa pa e Gobierno anterior, esta Gabinete Eman II y pone e capitulo aki tras di lomba. Di e manera aki, Aruba por sigui inverti y pa sigui progresa.
