Prome Minister Evelyn Wever-Croes: DISCURSO DI PROME MINISTER NA ACTO PROTOCOLAR RIBA DIA DI HIMNO Y BANDERA

Ban sigui traha den union y positivismo pa realisa nos soñonan, y pa realisa cosnan grandi pa Aruba.

Diasabra 18 di maart, Aruba henter a conmemora cu 47 aña pasa Aruba a haya su propio himno y su bandera, y cu despues Aruba a bira  un pais autónomo den Reino Hulandes. Manera un costumber, e mainta aki, na Plaza Libertador Gilberto Françios ‘Betico’ Croes a tuma luga e acto protocolar na unda cu por a disfruta di diferente discurso y atraccionnan. Prome Minister Evelyn Wever-Croes a duna un bunita discurso na unda cu el a enfatisa e importancia pa sigui traha den union y positivismo pa realisa soñonan como un pueblo y realisa cosnan grandi pa Aruba.

IMPACTO DI NOS DI HIMNO Y BANDERA

“47 aña pasa, den un stadion Wilhelmina, nos bandera a wordo carga y hisa pa prome biaha. Y nos himno, cu tabata un cantica popular antes, a wordo inaugura como nos himno, y un a couplet a wordo añadi. E couplet pa mi mas importante ta e couplet nobo: grandesa di bo pueblo ta, su gran cordialidad. Cu Dios por guia y conserva, su amor pa libertad. Laga e palabranan aki drenta den bo mente.

47 aña pasa nos himno a wordo inaugura, hunto cu nos bandera. Ami tabata eynan, un mucha muhe di apenas 9 aña, yen di soño, yen di aspiracion. Y mi ta corda e momento ey manera cu ta ayera, e sentimento asina special di mira nos bandera, di mira MI bandera bay halto, nos simbolo di union, di identidad, y di libertad. E momento ey a haci un impacto hopi grandi riba mi, mescos cu mi ta sigur el a haci un impacto tambe riba cada un di boso. Y e mesun emocion mi ta sinti awor ainda, cada biaha cu mi mira nos bandera wordo hisa, sea pa actividadnan oficial, of den deporte, ora Aruba gana un medaya. Nos bandera, nos simbolo di identidad.

Y no ta cerca mi so. E aña aki, ora nos a bishita scolnan pa mira con nan ta preparando pa nos dia nacional, mi a puntra e muchanan, kico bo ta sinti ora bo ta mira e bandera di Aruba wordo hisa. Y nan a contesta, “nos ta sinti hopi orguyoso”, “nos curason ta tembla”, “nos ta haya kippevel”. Wel, mi a bisa nan, e ora bo sa cu bo ta stima Aruba.

E LUCHA PA OBTENE NOS SIMBOLONAN DI UNION Y IDENTIDAD

Y ta danki na e stimacion ey pa Aruba, nos a logra realisa e anhelo di nos pueblo pa ta un pais liber. E lucha pa nos ta un pais liber, pa ta baas den nos mesun cas, no ta un lucha nobo. E  ta un lucha cu a cuminsa na añanan 40, bou liderazgo di e politiconan Henny Eman y Juancho Yrausquin. Esaki a culmina den entrega di lista di 2147 firma di ciudadanonan di nos pais, na aña 1947. Un di esnan cu a firma e lista tabata di mi welo Panchico Croes, awe den feliz memoria.

A pesar cu dirigentenan politico e tempo ey no a sigui cu e lucha, e deseo den curason di e pueblo pa ta un pais liber, a sigui crece cada bes mas. Y den añanan 70 e lucha a wordo retoma pa e lider politico Betico Croes den feliz memoria. Y el a realisa cu un lucha asina, no ta completo sin su simbolonan di union. Un pais liber, mester tin su simbolonan di identidad. P’esey Aruba mester a haya su propio himno y su propio bandera. Y asina dia 18 di maart di aña 1976, nos a inaugura nos Himno y nos Bandera.

PANDEMIA A UNI NOS Y A DESMOSTRA E FORSA DI UNION

Y ta un alegría grandi pa mira cuanto hende a lanta trempan awe, hisa nan bandera, y ta aki awe pa celebra e dia. Esaki ta yena mi cu un emocion specialmente pasobra debi na e pandemia, e ultimo añanan aki, nos no por a celebra nos Dia Nacional manera mester ta. E pandemia mundial Covid-19 no a afecta celebracion di nos Dia Nacional so. El a afecta tur aspecto di nos comunidad. E la pone nos cuido di salud na prueba, y apesar cu nos no tabata prepara pa un crisis di e magnitud ey, nos profesionalnan den cuido a percura pa fortifica nos fundeshi di cuido. Varios persona a perde trabou, otronan a perde parti di nan entrada, companianan a cera. Y danki na e forsa y union di nos tur, awor Aruba ta den pleno recuperacion, y casi ta yegando nivel di prome cu pandemia.

Durante e pandemia nos a UNI, y nos a demostra e forsa di UNION, y mi ta convenci cu ta danki na e UNION y danki na e AMOR cu cada un di boso ta sinti pa nos pais, nos a logra surpasa e peor crisis mundial den historia di nos pais.

BAN INCULCA E SENTIMENTO AKI DEN CURASON DI NOS MUCHANAN

E aña aki nos por a mira con nos pueblo a prepara pa e celebracion di e dia di awe. Scolnan cu nos a bishita a demostra cuanto talento y creatividad, y sobre todo, amor nan tin pa nos pais. E festivalnan di canto pa nos himno y nos bandera siman pasa, y e manifestacion cultural di diabierna anochi, tabata otro muestra di con hopi nos ta stima nos dushi baranca Aruba. Y  tambe, e marcha cultural organisa pa scolnan na San Nicolas, tabata hopi hopi bunita.

Y mi ta haya hopi importante pa nos inculca e amor pa nos dushi pais, y e amor pa nos cultura den nos muchanan di hoben caba. E legado di mas bunita cu nos generacion por laga pa futuro generacionnan, ta pa inculca e sentimento aki den curason di nos muchanan. Pasobra e ora nos sa cu nan realmente ta stima Aruba. Y pasobra e ora, den momentonan dificil, cu sin duda lo tin den futuro tambe, nos por ta sigur cu nan ta wordo guia pa nan amor pa Aruba. Si bo ta wordo guia pa bo amor pa Aruba, e ora nunca bo ta comete eror.

Den esaki, nos como adultonan tin un papel importante pa hunga. Nos tin e responsabilidad, di inculca e sentimento ey den nos muchanan. Nos deber ta pa nos muchanan conoce nos historia, nos lucha, nos pais. Conoce nos himno y nos bandera di tal forma cu cada biaha cu nan wak nos bandera wordo hisa, e ta yena nan cu orguyo, cu emocion. Pasobra esey ta nan identidad. E ora nan sa ta dicon nan mester comporta manera ciudadanonan civico. E ora nan sa dicon nan mester contribui na cuida nos medio ambiente. E ora nan sa dicon nan mester actua cu integridad, tur ora, hasta ora ningun hende ta wak.

GRADICIMENTO

Finalisando mi kier gradici tur cu a haci e celebracionnan e aña aki asina grandi. Colega Minister Xiomara Maduro, y Comision Celebracion Fiestanan Nacional (CCDN), tur e cantantenan, compositornan, areglistanan cu a participa na e festivalnan. Na tur esnan cu a bin di exterior pa celebra cu nos, parlamentarionan y ministernan di Corsou, Boneiro y otro pais. Na tur esnan cu a organisa actividadnan riba e dianan aki. DANKI pa engrandece nos celebracion nacional.

Aruba ta un pais bendiciona, y nos cada un ta bendiciona di ta biba na Aruba. Ban demostra esaki cu orguyo. Dia di Himno y Bandera ta brinda nos e oportunidad pa reflexiona, yena nos cu inspiracion, curashi y amor patrio pa den union nos atende cu tur reto, pa garantisa felicidad di pais Aruba.

RECONFIRMA NOS COMPROMISO CU ARUBA

Awe ta un bon momento pa nos reconfirma nos compromiso cu Aruba, nos compromiso di traha duro pa hiba nos pais padilanti. Den nomber di mi coleganan minister, Ursell, Xiomara, Glenbert, Endy, Dangui, Geoffrey, Rocco, mi ta reconfirma nos compromiso cu henter e pueblo di Aruba, cu nos lo sigui traha incansablemente riba recuperacion di nos pais.

Y nos tin hopi motibo pa ta optimista pasobra nos ta mirando avansenan importante di recuperacion. Riba tereno economico, diversificando nos fuentenan di entrada. Turismo ta y lo sigui ta e pilar principal di nos economia, y e turistanan ta biniendo bek nos isla. Aparte di turismo, nos ta enfocando riba diversificacion di nos economia, entre otro riba tereno di energia, cu ta mustra hopi prometedor pa Aruba.

Pues tin hopi motibo pa ta positivo. Ban sigui traha den union y positivismo pa realisa nos soñonan, y pa realisa cosnan grandi pa Aruba. Masha danki pa bo atencion, y un feliz Dia di Himno y Bandera. Cu Dios bendiciona cada ciudadano di nos pais”.