Un escenario cu a pone enfasis riba locual ta di Aruba
Durante e Manifestacion Cultural a haci uzo di e arte di video-mapping pa rindi honor na Aruba su baluartenan, paisahe, simbolonan y flora y fauna
Durante e Manifestacion Cultural di diabierna ultimo, publico por a admira un escenario y tambe e toren di Cas di Cultura, ilumina cu e arte di video-mapping pa rindi honor y pone enfasis riba locual ta di Aruba. Riba e escenario di Plaza Betico por a mira diferente imagen di nos baluartenan, paisahe, simbolonan y nos flora y fauna cu a trece un dimension extra na cada presentacion di nos artistanan local. E proyeccion di e caranan di nos baluartenan cultural riba escenario na momento cu e show y canto di homenahe tabata tuma luga, tabata impresionante y a causa emocion cerca e publico. Riba e toren di Cas di Cultura por a aprecia e letranan di e refrein di nos Himno cu a keda proyecta, dunando un toke special na e celebracion di Dia di Himno y Bandera.
Minister Xiomara Maduro di Cultura ta gradici e team di Comision Celebracion Dianan Nacional y tambe Elite Productions pa e bunita uzo di e arte di video-mapping, dunando Pueblo y specialmente nos artistanan un tarima digno di un celebracion nacional na honor di nos Dia di Himno y Bandera.
