Prome Minister Evelyn Wever-Croes:
Despues di negosacion intenso di varios luna
A YEGA ACUERDO RIBA LEYNAN DI REINO COHO Y RAFT

Despues di varios luna di negosacion intenso cu Hulanda, a yega na un consensus pa loke ta trata e Rijkswetnan di COHO y di RAFT.

COHO ta e ley di consenso di Reino cu ta regla e asuntonan cu tin di haber cu Landspakket y e sosten di likides. Esaki ta e ley cu Aruba mester a bay di acuerdo cu ne pa por a haya sosten di likides di Hulanda. Desde cu e pandemia a cuminsa, Aruba a presta riba 1200 miyon florin.

RAFT ta e ley di consenso cu ta regla e asunto di supervision financiero. Esaki ta e prome biaha den historia cu Aruba ta presta placa for di Hulanda y pa e motibo aki tambe Hulanda kier miho supervision financiero cu loke tin te awo cu Cft.

Prome Minister a remarca cu sinceramente, henter Aruba ta di acuerdo cu e forma con Cft a supervisa finansa di pais Aruba awo mientras cu e tempo aya bou di e gobierno di otro asignatura, e sistema no a funciona y mester a wordo cambia.

“Nos a traha extensamente riba e dos leynan aki y a tarda pa yega na un acuerdo pasobra nos kier a negosia y saca e miho version di e leynan aki cu ta posibel”, Prome Minister a enfatisa.

Mientrastanto, momento cu Hulanda a presenta e ley, Gobierno no a bay di acuerdo cu nan. Despues a manda nan pa Raad van State pa un advies. Y e advies di Raad van State a confirma e ponencianan di Aruba indicando cu hopi parti di ley mester a cambia y Hulanda a bay di acuerdo pa haci cambio. Den e ultimo lunanan negosacionnan a tuma luga pa ‘fine tune’ e ley pa percura cu ta un ley cu Aruba por cumpli cu ne y ehecuta.

Awo cu Gobiernonan a yega na acuerdo riba e ley aki, e leynan lo wordo manda pa e respectivo Parlamentonan y e textonan lo wordo publica pa asina Aruba henter por ta na haltura di e contenido di e leynan aki.

“Si bo puntra mi si ta leynan cu ami tawata kier pa Aruba, mi contesta lo ta no. Nunca mi tawata kier cu nos a yega asina leu cu Aruba mester a acepta e dos leynan di consenso aki. Sinembargo, Covid a dal nos hopi duro cu a causa cu Aruba mester a presta 1200 miyon florin for di Hulanda pa sigui cubri gastonan, atende cu e crisis di salud y brinda cuido di salud pa ciudadanonan, atende cu e tema di vacunacion, sigui paga pa enseñansa continua, siguridad por continua riba nos isla. Mescos cu tur caminda, ora presta placa, e prestado ta pone su condicionnan. Mescos cu den e caso aki di sosten di likides.

E leynan aki ta mishi cu nos autonomia. Nan ta pone cu nos ta dal un paso atras. Pero nos sa pakico nos a hacie. Nos a hacie pasobra nos tawata tin mester. Awo nos a dal un paso chikito atras pa despues nos bin bek cu pasonan grandi dilanti. Pa asina tambe nos traha riba un economia mas fuerte y asina logra un autonomia mas fuerte”, Prome Minister a duna di conoce.

E leynan lo ta den Parlamento den e siguiente dianan y lo hiba debatenan y Gobierno lo contesta preguntanan cu haya tocante esaki.

“Cu esaki tambe, e discusionnan entre Aruba y Hulanda ta yega na un fin. Nos tin consensus riba e punto aki y nos por sigui padilanti sin mucho discusion riba e tema aki mas entre Aruba y Hulanda”, Prome Minister a termina bisando.