Nos Aruba no lo wordo trapa, cana strit!
Recientemente a tuma nota un sucedido contra Minister Sr. Glenbert Croes

Si bo ta bishita nos pais bo ta atene bo mes na reglanan di nos pais. Bo ta siña e idioma si a caso nan no tin bo idioma como uno internacional. Mesun cos ta ora bo ta ricibi e pasport hulandes otorga pa Reino Hulandes cual ta permitibo tin acceso na varios pais den henter Mundo, un trato di respet ora bo bai otro paisnan pasobra bo ta pertenece na Reino Hulandes. Asina ta comporta bo manera un persona grata.

Nos pais cu hendenan cu bon curason y humilde pa añanan largo a laga situashonan pasa, a laga hopi di afo bin distrui material y y bida di hende. Por ehempel famia, cas, horta pertenencia, etc. A
traha un strategia pa cuminsa trafica nan mesun hendenan pa bin traha ‘zwart’, esta sin permiso, sin paga belasting, pa asina “contribui” na nos pais. Nan ta wordo ofreci un kamber pa awg.25,- pa dia, un hamaka pa awg.10,-. Tin biaha ta busca pareha of esnan di mas recurso pa por tin un dak riba nan cabes y asina aporta lo minimo. Esaki ta bai en contra di Derecho Humano, leynan di nos pais y Leynan Laboral International. Asina hopi ta yuda nan mesun hendenan. Bo ta yuda pa firma pa e persona, nan ta paga e permiso pero ta rabia ora nan no ta sigi haya nan resto di permisonan. Sin sa cu si e hendenan aki no ta cumpliendo cu ley pa un of otro motibo of esaki no lo wordo otorga. Ta tuma tempo pa loke ta trata investigashonan y sigur riba e conducta en general di e individuo aki.

Nos hendenan a wanta palabranan di insulto di hendenan cu ta bisitante di afo, a wordo chercha pa extranheronan. Y kiko nos ta drei haci, nos mes ta sigi yuda nan door di scondenan, nan ta bisa nan papelnan ta den proceso. Nos mester pidi nan documentonan y yama verifica, pasobra abo tambe ta actuando contra ley pa sconde ilegal na bo cas.

Mesun cos alto funcionarionan ta wanta tur tipo di palabranan di insulto, nan ta wordo defama y nan famianan ta wordo menasa of tin di nan a wordo mata. Sin sa cu ta e persona nan aki ta wordo persigi pa añanan largo caba. Ban recorda un rato e incidentenan grave e “wild wild west” un tempo pasa na un establicimento nightclub, otro na banco y esun na Renaissance Marketplace. Con cada un di nos t ayuda mantene Aruba un dushi lugar pa biba ta si nos tur mira algo incorecto pasa, no ignora, busca manera como ciudadano pa yuda Seguridad Nacional di nos pais, Aruba.

Un simpel ehempel mi ta tuma e incidente entre Sra. Trudy Hassell, un alto funcionario di Husticia, esta un Comisario di Polis, un mama, no solamente pa su 4 yuinan sino pa hopi hoben di tur edad y e señora cu a wordo deporta un tempo atras a lastra su nomber den plataforma social cu esaki a coste su carera mescos cu tur otro persona. Sin busca mas a lew cu Sra. Hassell tabata haci su trabou y conforme ley. Con nos mesun hendenan Arubiano por a expresa nan malcontento, pero tambe a aporta na defama Sra. Hassel. Nos tin cu stop di sconde tras di un plataforma cual ta liber pa expresa y pensa si bo lo expresa di e manera aki den un forma personal cu e persona aki.

Nos tin cu stop cu e mal ehempel di defama cualkier persona, acaso e poder eynan door di defama bo ta wordo paga pa haci esaki? Kiko abo como ser humano ta haya a cambio?

Acaso e rabia cu un ser femenino ta yega lew den bida y abo NO!? Acaso e poder di e hende hombre cu mester keda pensa cu nan ta keda manda mundo?! NO. Acaso e ta hacibo mihor persona pa daña otro su bida? NO.

AMOR TA SIGNIFICA RESPET TAMBE. No purba mes di menasa ningun hende, den pasado tabata Sra. Hassell, awe ta Minister Sr. Glenbert Croes y mayan e por ta cualkier di nos sea bringando pa bo mesun derechonan muher of homber. Asina ta, Pueblo lanta arriba. BO TA MISHI CU UN ARUBIANO, BO TA MISHI CU NOS TUR! Respeta nos Aruba, respeta nos hendenan y respeta nos leynan.
Abigael Arends – Profesional riba Area di Derecho Humano, Leynan Laboral International, Husticia.