PROME MINISTER A DUNA DISCURSO DEN E CUMBRE DI UNIVERSIDAD DI ARUBA

Universidad di Aruba e siman aki a organisa un cumbre sumamente importante. E tema di e cumbre ta Cambio Climatico. Cambio climatico ta afectando henter mundo. Door di esaki e nivel di lama ta subi y esaki por tin un efecto devastador na Aruba aki un par di aña si esaki continua. P’esey henter mundo ta trahando riba diferente paso cu por wordo tuma pa por mitiga e efecto aki. Un di e temanan mas importante ta e tema di energia y e CO2 cu nos ta emiti generando energia. Aruba a base di esaki a traha un energy policy, maneho di energia. Durante e simposio aki, Prome Minister Evelyn Wever-Croes a expone kico ta e metanan cu Aruba tin pa cu e cambio climatico y pa cu energia.

 

Aruba tin metanan pa baha e emision di CO2 pa asina baha nos carbon footprint pa asina nos por logra cumpli cu e tratadonan di Paris y e tratadonan di Nacionnan Uni. Aruba su carbon footprint mundial no ta grandi, e ta hopi chikito. Pero si paisnan grandi mester cumpli cu e palabracionnan di e tratadonan pa baha nan carbon footprint, Aruba tambe mester duna di su parti. Y e maneho di energia di Aruba ta dirigi riba con ta bay logra esaki pa 2030 y con despues tambe pa 2050.

 

Den maneho di energia di Gobierno, ta tene cuenta tambe cu cualkier forma di energia cu scoge, mester ta affordable y confiabel. Nos ta tene cuenta tambe cu e efectonan macro economico di esaki.

 

Aparte di e maneho di energia cu nos tin, ta importante tambe pa señala tambe cu nos tin plannan mas ambisioso ainda. Nos companianan di utilidad ta trahando riba un ‘decarbonization pathway’ pa asina logra e metanan aki mas lihe cu 2030 y 2050. Tambe introduccion di LNG ta logra tambe na yuda esaki mas prome y e plannan di hydrogen tambe por yuda pa logra nos metanan mas lihe.

 

Aparte di energia, tin tambe infrastructura. Mester cambia codigonan di infrastructura pa asina tur hende cu bay construi edificionan y casnan nobo na Aruba, tene cuenta cu e reglanan necesario pa asina nos por brinda cabes na problemanan cu cambio climatico ta trece cu ne.

 

Nos ta mira cu rond mundo tin mas horcan por ehempel. Temperaturanan ta birando mas calor. Pues tur esaki nos tin cu tene na considercaion y combina cu e echo cu e nivel di lama ta subiendo. Nos mester tene cuenta cu construccionnan tambe. Aruba su plan ta delinea, aworakinan nos ta den ehecucion di esaki pa asina Aruba tambe por brinda cabes na e problemanan di cambio climatico.