Minister Rocco Tjon:
TRABOUNAN A INICIA PA CU RENOBACION DI HUIS VAN BEWARING; GUARDA NOS COSTA
ORANJESTAD – Diaranson mainta, durante rueda di prensa, Minister di Husticia y Asuntonan Social Sr. Rocco Tjon, conhuntamente cu director di Guarda Nos Costa (GNC) Sr. Richard Kramers, a anuncia e proyecto grandi di renobacion di “Huis van Bewaring”, cual ta un inversion substancial cu ta bay wordo haci pa amplia e capacidad, caminda personanan indocumenta ta wordo ubica. E oficina principal di GNC lo wordo renoba, pero tambe lo bay crea un espacio caminda e personal por haci nan trabou bou circunstancianan mucho mas miho. Minister Tjon a enfatisa riba e importancia di inversionnan specifico pa loke ta trata trabou di e personal.
E proyecto aki ta acopla na un proyecto di ICT caminda ta bay percura pa e personal cu ta traha na GNC por tin un sistema automatisa den cual nan por traha y haci nan trabou. E proyecto aki ta cay bou di ActPol, mas specificamente e “module” pa loke ta trata e cadena di estranheria. ActPol, manera ta conoci, ta e sistema automatisa cu Cuerpo Policial tambe ta usa, pues di e forma aki lo bay percura pa e dos departamentonan aki ta mas sincronisa na otro, pa di e forma ey comparti informacion mucho mas miho cu otro.
E proyecto aki ta toca e parti di infrastructura y inversionnan cu ta wordo haci riba e parti tecnologico, pero di otro banda, manera ta conoci, luna pasa a firma un MOU entre GNC y Rode Kruis. Bou di e MOU aki, a brinda Rode Kruis acceso na e facilidadnan di GNC pa na momento cu tin un keho cu ta wordo haci, Rode Kruis mes por drenta y wak e circunstancianan bou cual e personanan ta wordo ubica. Segun e Mandatario a expresa, Gobierno di Aruba a asumi su responsabilidad y ta haciendo e inversionnan necesario. Sinembargo, na final di dia e ta keda e responsabilidad di cada persona cu ta wordo ubica na “Huis van Bewaring”, pa percura tambe cu e condicionnan bou cual nan ta ubica wordo bon manteni.
Por ultimo, Minister Tjon a enfatisa riba e hecho cu tin diferente inversionnan cu ta bay tuma luga, mirando tambe cu 2022 ta aña di inversion y oportunidad. Algun proyecto cu ta presupuesta pa aña 2022, y como tal a wordo inverti aden caba ta: Maritiem Politie, Departamento di Asunto Social cual ta bay continua cu e renobacion completo, construccion di e edificio nobo di FMAA/SPD y Guarda Nos Costa. Adicionalmente, dentro di dos siman, lo bay anuncia tambe, e renobacion completo di e brandweer post na San Nicolas, cual ta proyecta di ta un inversion bastante grandi. Minister Tjon a manda palabranan di pabien y gradicimento na DOW como tambe e compania ALBO cual ta bay percura pa e proyecto di renobacion aki di “Huis van Bewaring” por ta uno exitoso.
