Parlamentario Setty Christiaans-Yarzagaray (MEP):
Cu excepcion di un punto, Aruba ta den cumplimento cu tur otro puntonan di Landspakket

Parlamento a ricibi for di Minster Presidente, sra. Evelyn Wever-Croes, den nomber di Gobierno di Aruba, e Uitvoeringsrapportage di Aruba, Corsow y St. Maarten te cu kwartaal 4 di 2021. E rapport aki ta pertenece na e trayecto di e Landspakket unda ta indica e progreso di e agenda di ehecucion riba nivel di actividadnan cu mester wordo logra pa tema.

 

E rapportage aki ta duna Parlamento un bista ki stapnan concreto a wordo tuma pa realisa e plan di reforma y inversionnan necesario a base di prioridad. Un punto cu a bin dilanti segun COHO cu a resalta pa tur tres pais ta e capacidad humano necesario pa e diferente Gobiernonan. Esaki por ta un risico pa e progreso di e cumplimento cu Landspakket. Pero na mes momento a cera colaboracion mas estrecho cu e TWO (Tijdelijke Werkorganisatie) pa caba di prioritisa e condicionnan mara na e Landspakket, pa scherp aan e haalbaarheidstoets y pa fortalece e aparato Gubernamental na un forma duradero. E ultimo ta mas dirigi riba sosten tecnico pues aki por nota cu ta busca alabes solucion mas structural entre Aruba cu TWO (cu ta di Hulanda).

 

Pa Aruba e Landspakket ta rekeri hopi di e organisacion publico. Diferente onderzoek riba diferente tereno a start caba. Investigacionnan dirigi riba por ehempel Finansas, Subsidiestelsel, funcion di HR, Arbeidsbeleid y Socialzekerheidsstelsel. E investigacion riba e tereno Economico ta cla cu ta e “Ondernemerschap en Investeringsklimaat”. E rapport cu e recomendacionnan ta indica ki regulacion necesario mester prepara pa fortifica e columna Financiero. Tambe e preparacion necesario riba nivel ambtelijk pa formula decisionnan riba maneho administrativo. Manera riba e topico di sistema di Belasting cu segun recomendacionnan ta pa scoge pa un sistema di BTW y tambe ta indica e necesidad pa reforma Belastingdienst.

 

Un punto di preocupacion ainda ta riba e tema di Cuido (Zorg). E sondeo of investigacion stipula den punto F.3 di e Landspakket ta bisa cu e doorlichting a hiba atraso pero cu ta premira cu pa fin di aña esaki mester ta finalisa.

 

Loke ta importante pa Parlamentario Setty Yarzagaray ta cu Aruba tin un punto so di e Landspakket pendiente pero tur otro punto riba tur otro area tin un indicacion cu nan ta den proceso of finalisa di banda di Aruba. Compara cu e otro islanan, Aruba ta e unico cu tin un punto ainda pendiente cu ta mustra cu Aruba ta esun miho den cumplimento. Pa loke ta Corsow y St. Maarten tin mas punto pendiente pa finalisa segun e rapportage aki.