Lisboa Bar ta celebra su di 50 aniversario

Awe, 3 di juni, pero 50 aña pasa, a habri su portanan loke nos conoce awendia den e bario di Socotoro como LISBOA BAR.

Tabata na aña 1953 cu señor Jose Fernandes Perna, cu apenas 24 aña di edad a sali di Madeira, rumbo Sao Paolo, Brasil, lagando atras su señora na estado. Despues di a traha 1 aña na Brasil, el a biaha pa Caracas, unda el a traha pa dos aña.

Tres aña despues, riba dia nacional di Portugal, 10 di juni 1956, el a yega Aruba. Dos aña despues el a manda busca su señora Virginia (dfm) y nan prome yiu Jose.

Despues di a labora varios aña na aeropuerto, como tambe hardinero , den construccion y coriendo garoshi di palo friu, el a cumpra un cas di tabla bieu na Socotorolaan 3. El a benta esaki abou y construi su cas y un negoshi riba e tereno.

Asina, riba 3 di juni na aña 1973 Jose y Virginia a habri nan negoshi bou di e nomber LIBERTY BAR. E nomber aki no a keda pa hopi tempo, ya cu e mesun aña nan a dun’e e nomber oficial di LISBOA BAR.

Manera tur negoshi, a pasa den añanan bon y menos bon.

E clientela di LISBOA BAR ta bin for di tur bario na Aruba. Sea nan ta bin busca e sandwichnan original pa cual LISBOA ta conoci p’e, of ta bin dal un paar di drinks of cerbes bon friu. Remarcabel ta cu LISBOA BAR ta un di e poco establecimentonan den su estilo di e generacion Portugues anterior ainda den existencia.

Pa mas cu 30 aña, Alvaro Fernandes Perna, e yiu mas chikito di Jose y Virginia, ta manehando LISBOA BAR.

Pa medio di esaki, Alvaro Fernandes Perna ta gradici tur nos clientenan di antes y awor y henter pueblo di Aruba pa e sosten duna na LISBOA BAR durante e 50 añanan di existencia. MASHA DANKI ARUBA!

𝐓𝐮𝐦𝐚 𝐟𝐨𝐫 𝐝𝐢 𝐩𝐚𝐠𝐢𝐧𝐚 𝐍𝐨𝐬 𝐇𝐢𝐬𝐭𝐨𝐫𝐢𝐚 𝐧𝐨𝐬 𝐇𝐞𝐫𝐞𝐧𝐜𝐢𝐚