Aruba Tourism Authority a reuni cu ehecutivonan di VRBO y Airbnb na New York

Aruba Tourism Authority (A.T.A.) a culmina un bishita exitoso na New York e siman aki, unda a pone enfoke riba e topico di ‘Vacation Rentals’ / ‘Short term rentals’.

Ronella Croes, CEO di A.T.A. y Dyane Vis-Escalona, Business Manager di A.T.A. a reuni cu entre otro Tim Rosolio kende ta Vice Presidente di Vacation Rental Partner Success na Expedia Group (bou di cual e plataforma di VRBO ta resorta) y Carlos Munoz di Airbnb cu ta encarga cu ‘Public Policy’ pa e area di Centro America y Caribe. Carlos a wordo acompaña pa Liliana Herrera kende ta ‘Head of Transparency and Personal Data Proteccion’. Ambos plataforma ta masha popular y hopi prominente ora ta trata oferta di acomodacionnan alternativo -incluzo na Aruba.

Agenda pa ambos reunion a enfoca riba e topico di coleccion di impuesto debido, basicamente con por traha hunto pa sigura cu esaki ta sosode y cu tur acomodacion ta paga entre otro e impuesto di “toeristenheffing” (ex room tax) na ordo. Lo bay traha hunto riba esaki haciendo uzo di mas conocemento cu tin aworaki di practicanan (“regulatory framework” e.o.) cu a funciona na otro pais / ciudadnan y claro teniendo cuenta kico ta importante pa Aruba. Aruba ta den e proceso cu analysisnan presenta pa varios partido localmente (incluzo di parti di Ministerio Economico / VRPA, AHATA y A.T.A.).

Ta pa algun aña caba cu A.T.A. a bin ta haci esfuerzo pa pusha pa mihor coleccion. Asina por bisa cu na 2016, a firma e prome MOU entre A.T.A. y Airbnb. Na 2019 a firma e segundo MOU entre A.T.A. y Airbnb reiterando atrobe e compromiso. Ministernan di Finansas y Turismo tambe a firma e MOU aki.

A papia cu Airbnb specificamente riba “best practices” y kico por haci pa Aruba. Conhuntamente cu Ministerio di Turismo, kende a crea un plataforma consistiendo di Ministerio, A.T.A., DIMP, CBA, AHATA, VRPA, y DIP, lo trata e proposicionnan presenta. Manera ya indica, ta spera cu awor si lo por concretisa esaki. Airbnb a presenta diferente modelo concreto di con por asisti Aruba den colecta impuestonan necesario.

Pa cu VRBO, esaki ta mas bien un encuentro inicial pa asina sigui traha den e mesun direccion y yega na acuerdo concreto cu e partido aki tambe.

E agenda di reunionnan tambe a enfoca riba colaboracion pa comparti informacion y estadistica, como tambe colaboracion pa entrena e sector di ‘Vacation Rentals’ / ‘Short term rentals’ y sigura calidad halto.

Banda di e reunionnan a asisti na e conferencia di ‘Short term rentals’ di Skift, cu a conta cu un total di 24 orador incluyendo Rafat Ali, CEO/Fundador di Skift, ehecutivonan di Homes & Villas di Marriott/ Bonvoy (nota: Marriott tambe ta ofrece ‘Vacation Rentals’), y Booking.com otro plataforma popular.

Na Aruba, e averahe di propiedadnan disponible como ‘Vaction Rentals’ den un luna a crece di 3,836 na 2019 pa 5,971 na 2022. (Fuente: Transparent | A.T.A.). Na 2022, 25% di bishitante “stay-over” a keda den e categoria  di acomodacion alternativo y entre januari cu april 2023, e cantidad di bishitante cu a keda den e categoria aki ta 29%.

Por lo general por bisa cu segun e conferencia ta spera cu mescos cu pa e sector hotelero, e sector di ‘Vacation Rentals’ tambe lo mira un normalisacion despues di crecemento fuerte den volumen y prijs averahe pa estadia.

A.T.A. ta comprometi pa sigui colabora y comparti conocemento cu tur partido pa asina maximalisa e potencial di e categoria di acomodacion aki. E ta un hecho cu tin interes di mercadonan den e tipo di acomodacion aki. A.T.A. lo sigui cu promocion di ‘Vacation Rentals’ den mercadonan di interes, manera por ehempel e mercado Hulandes cu tin un preferencia pa e tipo di acomodacion aki. E meta ta pa stimula crecemento sostenibel den e industria turistico di Aruba y ofrece bishitantenan un variedad balansa di opcionnan di alohamento cu ta cumpli cu nan preferencia y presupuesto.

Pa A.T.A. ta importante pa e desaroyo ta uno unda ta tene cuenta cu nos biba riba nos isla. Asina por pensa riba un A.T.A. cu lo sigui ta na mesa pa guia e desaroyo aki debidamente den cuadro di e.o. aspectonan manera capacidad di carga, zonificacion etc. Pa esaki A.T.A. ta haciendo otro analysisnan debido entre otro di capacidad di carga.