Minister Maduro di Cultura ta brinda informacion riba Parada Nacional di Luz

ORANJESTAD – Gobierno di Aruba den antesala di e celebracion di Nos Dia Nacional, ta organisa un Parada Nacional di Luz den cual e colornan di e bandera di Aruba lo briya den e cayanan di Oranjestad.

E evento publico aki ta parti di e ‘exit strategy’ cu ta aplica pa Aruba por bay bek na normalidad despues di un temporada di 2 aña cu nos Pais a enfrenta e crisis cu e pandemia a trece cune. Carnaval ta un di e eventonan publico y cultural cu no por a tuma lugar mas y pesey como strategia di salida, Gobierno den bon cooperacion cu ATA y nos companianan estatal ta organisa un parada den cual gruponan di carnaval y e bandanan cu ta compaña nan por haya oportunidad di recauda fondo pa prepara pa Carnaval na aña 2023.

Organisacion di e evento publico aki ta den man di Ministerio di Cultura hunto cu Comision Celebracion Dianan Nacional (CCDN) y Departamento di Cultura. Debi cu fondonan pa e actividad ta limita, a reuni cu SMAC, Gruponan Uni y MUSICA pa sondea e interes di e gruponan. E gruponan cu a mustra interes awor lo mester registra y lo ricibi e reglanan aplicabel pa e gruponan y bandanan cu ta participa na e Parada Nacional di Luz. Registracion ta tuma lugar na Departamento di Cultura. Mas informacion riba e parada lo wordo vocifera pa sr. Lyonel Dirksz kende ta keda encarga pa atende cu pregunta di prensa y gruponan cu ta participa.

Aruba, chikito y simpel bo por ta, pero si respeta. E apelacion ta pa nos haci bon uzo di e oportunidad cu ta presenta pa nos biba nos cultura brindando respet na e colornan di nos bandera. Ban percura cu nos participacion y bon comportacion haci e parada aki uno existoso y digno di respet pa nos Pais.