Prome Minister Evelyn Wever-Croes:
ARUBA TA SALIENDO FOR DI E DI 5 OLA DI COVID
Casonan activo di covid a baha bou di 100, y no tin ningun hende den cuido intensivo
ORANJESTAD — Diamars 14 di februari, e casonan activo di Covid a baha bou di 100, 91 pa ta exacto. Ademas, no tin ningun persona den cuido intensivo. Cu esaki, segun e criterianan di un crisis, Aruba ta saliendo for di ola number 5.
Durante un conferencia di prensa dos siman pasa ya caba Minister President a anuncia e strategia di salida, basa riba e cifranan na e momento ey. Ola number 5 di Covid, cu e variante Omicron, a causa cantidadnan record, cu 5387 caso activo apenas 5 siman pasa, pero tambe por conclui cu e tabata un variante leve, pasobra el’a pasa mas lihe y tabata menos contagioso.
Principalmente, e cantidad di persona cu tabata den Hospital tabata maximo 55 riba un dia, un luna pasa. Awe ta 11. Den cuido intensivo na Aruba, e maximo cu ola 5 a causa tabata 6 patient cu Covid. Dialuna 14 di februari, pa di tres dia consecutivo, no tin patient di Covid den cuido intensivo. Basa riba esaki por conclui cu ola number 5 di Omicron tabata mas leve, y nos ta saliendo di Ola nr 5.
“E cifranan di Covid pues ta bahando y e siman aki CrisisTeam tin riba agenda pa flexibilisa e mayoria di e medidanan. Esaki ta bon noticia, y ta danki na comunidad di Aruba, cu ta compronde cu Covid lo tey pa hopi tempo mas, pero ta nos mester cuida nos mes y nos famia. Gobierno ta bay stop cu e medidanan pasobra e cantidadnan di caso activo ni di persona den hospital, ta hustifica pa mantene e medidanan. Mi ta compronde cu tin hendenan preocupa, y mi ta admiti, mi tambe ta preocupa, pero mi sa tambe cu nos ta haciendo locual cu nos mester haci: elimina e medidanan, y pone e responsabilidad awor riba cada ciudadano pa nan mes cuida nan mes y nan famia.
Mi kier expresa mi gratitud y admiracion un biaha mas pa nos frontliners, integrantenan di Crisisteam, y pa tur esnan cu apesar di circumstancianan dificil, a keda duna tur di nan mes, pa mira Aruba progresa.
Awor ta e momento pa nos economia cuminsa bay bek na normal, pa asina tur esnan cu a sufri bou di e pandemia aki haya oportunidadnan atrobe, y haci locual tanto nan ta stima. Awor ta e momento di oportunidad y inversion den nos pais y ta hunto so nos por hacie. Januari tabata un luna duro pa turismo, pero awor nos ta wak nos turismo ta pick up bek. Ban saluda nos bishitantenan cu e mesun amabilidad y cordialidad di semper. Aruba ta bendiciona, y e amor cu nos tin pa nos pais, ta locual lo yuda nos bay padilanti”, Prome Minister Evelyn Wever-Croes a expresa.