Prome Minister Evelyn Wever-Croes:
PROME MINISTER EVELYN WEVER-CROES HUNTO CU MINISTER URSELL ARENDS TA REUNI CU COMISION CORPORATE GOVERNANCE
Prome Minister Evelyn Wever-Croes hunto cu Minister Ursell Arends a reuni cu miembronan di e comision di Corporate Governance bou dirigencia di señor Jossy Lacle. E reunion aki tabata uno fructifero na unda a repasa tareanan cu a wordo inicia y completa den 2021.
Prome Minister a institui e comision aki durante Gabinete Wever-Croes I cu e meta pa Gobierno y su persona haya asistencia den e sector di Corporate Governance. Basa riba e consehonan ricibi, a duna inicio na e ley y codigo di Corporate Governance y a yuda cu e Wever-Croes norm.
Durante e reunion tambe a repasa riba e plan anual pa 2022 consistiendo di diferente accionnan entre otro finalisa e ley di Corporate Governance, Wever-Croes norm y e codigo pero tambe institui un autoridad, Corporate Governance cu lo bay supervisa e sector aki den futuro.
Aparte di tur esaki, Prome Minister a indica, e aña aki e comision lo prepara e fundeshi pa e maneho cu Gobierno lo bay aplica como shareholder den companianan ya cu Gobierno como shareholder tin derecho den algun compania. Importante ta pa tin un maneho riba esaki cu ta actualisa y e maneho aki tambe lo wordo prepara.
“E tabata un bon reunion y cu esaki Gobierno ta garantisa e integridad den e sector semi-publico di loke ta trata companianan estatal y fundacionnan entre otro.” Prome Minister Evelyn Wever-Croes a expresa.
