Minister Dangui Oduber
E industria crusero dunando señalnan positivo
ORANJESTAD – Diamars Minister di Turismo y Salud Publico Sr. Dangui Oduber den un entrevista a vocifera cu e ta hopi contento di por mira 3 barco crusero mara na nos waf. Segun e mandatario esaki sigur ta duna un señal hopi positivo pa cu e recuperacion di Aruba su turismo crusero. E mandatario a menciona cu segun Aruba ports Authority (APA) su proyeccionnan Aruba lo bay recupera 60% di su turismo crusero den aña 2022 den comparacion cu aña 2019 cu tabata un aña record caminda a ricibi casi 830 mil turista crusero.
Minister Oduber a trece dilanti cu Aruba su turismo crusero no a pasa den su mihor momento den e ultimo 2 añanan pa motibo di e pandemia. Ta apenas den luna di juni di 2021 Aruba a ricibi su prome barco crusero na momento cu e frontera maritimo a habri bek despues cu esaki a keda sera pa mas di 1 aña y 3 luna. Den aña 2021 e turismo crusero a sera cu solamente 16% di recuperacion den comparacion cu aña 2019 segun e mandatario. Pero Minister Oduber ta hopi contento con e recuperacion ta bayendo y tambe e proyeccionnan positivo cu APA tin.
Tambe Minister Oduber a trece dilanti cu e “Exit Strategy” cu a ser anuncia dia 17 di januari ta den pleno ehecucion pa asina Aruba bolbe bek den normalidad. Aki gobierno ta bay ta flexibilisando tur e medida nan pa asina tur hende por hiba e bida normal cu nan ta custuma di dj prome cu e pandemia. Tur esaki ta posibel mirando cu actualmente di menos di 100 caso activo di COVID-19 compara cu 1 luna pasa cu Aruba a conoce casi 5 mil caso activo. Esaki ta haci posibel pa gobierno bay sigui enfoka riba e recuperacion di nos turismo crusero y nos turismo en general. Tambe pa sigui percura pa e recuperacion di Aruba su economia pa asina crea tur e oportunidadnan cu mester crea pa Aruba su economia por florece bek.
Finalmente Minister Oduber a menciona di ta hopi contento con e luna di februari a habri den comparacion cu e luna di januari y e ta sumamente optimista di con henter e aña 2022 lo bay caminda Aruba lo bay recupera 100% di su turismo bek.
