Minister Xiomara Maduro den conbersacion cu Secretario di Estado Van Huffelen:
Nos Pueblo mester trankilidad y union pa por haci e cambionan necesario pa un Aruba mas fuerte
ORANJESTAD – Den un reunion special di Conseho di Minister, Minister Maduro a cera conoci cu Secretario di Estado sra. Van Huffelen. Tabata un rato ameno den cual a toca Minister Maduro tambe pa yama e mandatario Hulandes Bon Bini na Aruba. Minister Maduro a cuminsa na gradici sra. Van Huffelen pa adresa nos Pueblo den nos dushi Papiamento na momento di su introduccion como Secretario di Estado encarga cu Asuntonan di Reino. Como Minister di Cultura nos ta aprecia e gesto aki. Tambe Minister Maduro a conbersa cu e mandatario riba e retonan den e cartera di Finansa y a splica cu te na momento di e pandemia, Aruba tabata bayendo den bon direccion.
E pandemia sigur a afecta nos Pais su finansa grandemente y como mandatario ta contento cu Aruba a haya e fianzanan di Hulanda pa por a enfrenta e pandemia. Minister Maduro a indica cu e condicionnan cu mester cumpli cu nan pa por a haya e fianza no ta facil y sigur e condicion di recorte di 12,6% a trece hopi inkietud cune. Minister Maduro a haci uzo di e oportunidad pa haci un apelacion pa revisa e condicion di e recorte di 12,6% pa asina por trece trankilidad bek den comunidad. Na Aruba tin retonan grandi y decisionnan importante pa wordo tuma y pa esaki mester tin union y trankilidad den pueblo.
