Parlamentario Hendrik Tevreden (MEP):
Mi ta sinti cu den sra. Van Huffelen Aruba por yega hunto cu Hulanda na mihor palabracion

E prome bishita di Secretario di Estado sra. Van Huffelen a cay na su agrado, parlamentario Tevreden a remarca. Principalmente pasobra e funcionario anterior, sr. Raymond Knops, nunca a tuma e tempo pa reuni o conoce e representantenan den parlamento. E ta mira esaki como un bon prome señal di e negosacionnan cu lo tin di continua pa loke ta trata landspakketten y RAFT. Diamars ultimo parlamento a reuni cu sra. Van Huffelen y sigur a probecha pa trece dilanti e puntonan cu ta sinti cu mester wordo atendi.

Reunion cu sra. Van Huffelen
E encuentro cu Secretario di Estado van Huffelen a duna e oportunidad pa gradici su persona pa inclui parlamento riba su agenda, pero di biaha a atende tambe e punto di recorte di 12.6% (afbouw versoberingsmaatregelen). Ta conoci cu ambtenaarnan y esnan semi publico desde 1 di mei 2020 a haya un recorte di 12.6% parti riba nan salario y benificionan. Esaki e tempo ey tawata un condicion pa por a concretisa e sosten di likides cu Aruba tawata tin mester pa por a atende y yuda cu Fase entre otro. Sinembargo awor casi dos aña despues, Tevreden ta haya oportuno pa por cuminsa fiha un final na recorte y normalisa e salarionan. No solamente esaki ta pisa ariba e trahadornan y nan famia, pero e por trece cambio tambe riba nan pensioen pa futuro si e dura mas largo. Tevreden ta di opinion cu no tin di tarda largo mas, y ta pesey ta busca e sosten di sra. Van Huffelen pa por trece un cambio den esaki den e negosacionnan cu nan ta hibando y pa e decisionnan cu lo tin di wordo tuma den Rijksministerraad aya na Hulanda.

Tevreden ta sinti cu e actitud cu e Secretario di Estado aki a bini ta mustra, lo tin mucho mas posibilidad pa keda na mesa cu Hulanda y yega na mihor comprondemento cu tempo di sr. Knops. E actitud y acercamento parce di lo por trece cu ne oportunidadnan nobo den negociacion di Landspakket y Raft.

Aruba su Gobierno ta cumpliendo cu e palabracionnan hasi den e protocol y ta trahando pa por logra e acuerdonan proponi. Pero awor nos kier bai den direccion di normalisacion di e beneficionan di e clase trahador y nan salario. Aki nos kier pa sra. Van Huffelen yuda basha awa den biña y yuda Aruba pleita su caso na Den Haag. E speransa ta grandi den Van Huffelen, ban spera cu despues di mitar di aña e negosacionnan lo por cuminsa yega den e direccion aki. Ken sa cu si por concretisa esaki cu pa december tur trahador lo ricibi nan 12.6% completo pa asina di nan parti sigi contribui na nan famia y e economia local. Nos ta keda positivo.