Parlamentario Marco Berlis (MEP) na Sra. Gunn (MAS) part 1:
Pone Aruba su bienestar na prome lugar ta algo bon pa bo tambe practica

Siman pasa Sra. Gunn di fraccion di MAS a reacciona riba un di e 4 articulonan cu mi a publica tocante RWZI. Lastimamente su reaccionnan riba e articulonan no tin nada di haber cu hechos, cifras, ni evidencianan cu mi a trece dilanti, pero si a tuma e tempo pa desacredita mi persona sin ningun base.

Sra Gunn: “Ningun momento fraccion di MAS a of ta haciendo daño na imagen di nos dushi isla”
Sra. Gunn, mi ta desea pa bo mes mira e screenshot aki di un turista cu ta puntra den un grupo hopi grandi y conoci riba e plataforma di Facebook si nos awanan ta safe. Fraccion di MAS nunca a vocifera encontra di AVP su acusacion cu nos lama ta contamina. Di berdad boso ta kere cu hende no por baña na nos beachnan? Papia cla! Door di no vocifera bo ta complice di e crimen aki unda AVP a ataca nos pilar economico di Turismo cu mentira. Tanto bal bo yama un reunion pa haci show politico y abo y sra. Lopez-Tromp ta vota CONTRA di e solucion cu mi a presenta den forma di un mocion pa trece un plan di mantencion structural y meerjarenplan pa RWZI, pa bin cu un planta nobo pa RWZI, y pa aloca fondo di begroting pa cu esaki.

Sra Gunn: “No ta autoridad di sr. Berlis pa determina cua bishita di trabou ami como Parlamentario ta presencia of no”
Esaki ta corecto Sra. Gunn, pero locual ta corecto tambe ta cu ningun momento mi a bisa of insinua esaki. Lesa ta keda un arte berdad. Laga mi quote locual mi a bisa “Dimes miembronan di Parlamento di coalicion tabata tey, y sra Gunn di fraccion di MAS tambe tabata tey. Ma keda sorprendi un biaha mas, pasobra el a yega trempan.” Locual cu mi kier a remarca ta e acto di hipocresia, y no cu e no tin e derecho pa haci e bishita di trabao. Dicon hipocrita? Pasobra despues cu boso a vota ENCONTRA di un mocion presenta pa mi persona, bo kier bishita expertonan cu ta luchando pa mehora e planta y salvaguardia e bienestar di Aruba y haci manera bo ta interesa den e planta su estado y vision pa futuro. For di e momento cu bo a grita “contra” den sala di parlamento y no a presenta ningun otro solucion e ta mas cu bisto cu ta show politico tawata lo mas importante pa fraccion MAS.

Sra Gunn: “Kisas lo ta oportuno pa e tuma den reconsideracion di pone un paro na lesamento di dictado”
Bo tin rason sra Gunn, mi ta lesa loke ta skirbi den mi ipad. Pasobra mi ta lesa rapportnan, lesa e leynan, lesa RVA, documentonan alcaso, lesa e historia di e contenido, lesa investigacion haci, mi ta haci notulen, observacionan, mi ta bay reunionan cu expertonan, haci pregunta y documenta nan contestacion. Mi ta educa mi mes pa compronde kico ta e realidad y berdad di tur asunto. Ora mi vocifera mi mes ta pasobra mi tin entendimiento profundo di loke mi ta papia. Mi ta documenta mi mes pa asina caba cu e politica bieu y partidista cu boso ta hiba, cu ta sirbi solamente boso propio interes. Ora mi papia mi ta menciona hechos cu base, cifras corecto y ta percura pa respeta tur profesional door di reproduci e informacion corecto. Lastimamente ainda mi no tin un memoria fotografico.

Di e forma aki Sra Gunn ami ta practica loke mi ta predica!