Minister Rocco Tjon:
A BISHITA BRANDWEER POST NA SAN NICOLAS PA ANUNCIA E INICIO DI E PROYECTO DI RENOBACION
ORANJESTAD – Dialuna mainta Minister di Husticia y Asuntonan Social Sr. Rocco Tjon, hunto cu SINBA y Management Team a bishita e brandweer post na San Nicolas, pa asina anuncia e inicio di e renobacion cu ta bay tuma luga. Ta trata di un proyecto grandi caminda lo bay inverti 1.6 miyon florin, pa asina renoba e brandweer post na San Nicolas por completo. Adicionalmente, lo tene cuenta cu e parti di electricidad, pero tambe lo instala un sistema avansa di camara, pa asina por garantisa siguridad di tur esnan cu ta emplea na Brandweer. Pues, practicamente por papia di un Brandweer post completamente nobo pa San Nicolas.
Aña pasa, a inicia e combersacionnan entre SINBA y e management team, caminda diferente puntonan di preocupacion a wordo treci padilanti. Ta trata di preocupacionnan pa cu material, circunstancianan di trabou di e diferente postnan, como tambe e parti di e posicion huridico di e personal. Manera ta conoci, cada dos siman, Ministerio di Husticia y Asuntonan Social ta reuni cu Sindicato y Management Team, pa asina brinda e debido atencion na tur e puntonan di preocupacion cu ta wordo treci padilanti. Na December 2021, a inverti cinco miyon florin pa por adkiri diferente trucknan nobo pa Brandweer, pero tambe a inverti esaki den “opleiding”. Den luna di April, lo bay cuminsa cu un “opleiding” cu ta di suma importancia pa e personal, y di e forma aki ta duna atencion na tur e puntonan aki.
Por ultimo, Minister Tjon a gradici DOW kende na Oktober aña pasa a percura pa e proyecto aki haya su destaho, cual a wordo gana door di e compania “Albo Aruba”. Pa e proximo 120 dia nos dilanti ful e post di San Nicolas lo bay wordo renoba, pa asina e personal cu ta traha na e post aki por tin un warda completamente nobo. E Mandatario a manda palabra di pabien tambe pa SINBA como tambe e Management Team cu constantemente y na un manera hopi positivo y pro-activo, no solamente ta trece problemanan padilanti pero tambe solucionnan, pues di e forma ey Ministerio por percura pa esakinan wordo ehecuta.
