Minister Rocco Tjon: A BISHITA KIA DEN CUADRO DI RENOBACCIONNAN CU A TUMA LUGA

ORANJESTAD – Minister di Husticia y Asuntonan social sr. Rocco Tjon, a bishita e instituto coreccional di Aruba, caminda a haya un rondleiding di e ekipo di maneho actual, mirando cu tin diferente renobacionnan cu a tuma luga. Entre otro, e Centro di Motivacion (CDM), a wordo renoba por completo, y e plan ta pa e parti aki bay wordo uza bek. Consecuentemente otro renobacionnan tambe lo bay tuma luga paden di KIA pa asina crea binti cupo adicional di cel a corto plaso, caminda por percura pa detene hende mirando e scarcedad di capacidad di detencion cu tin actualmente.

Hunto cu e ekipo di maneho, a elabora amplio riba e proceso y proyecto pa yega na un instituto coreccional nobo. E dossier completo a wordo entrega na Hulanda dos siman pasa, y awo ta en espera di un contesta di Hulanda pa asina por inicia cu e proceso di wak con nos por logra yega na financiamento pa cu esaki a largo plaso, a traves di un bon colaboracion. Pues, di e forma aki e proceso lo por inicia, mirando cu ta trata di un proceso cu un duracion bastante largo.

Banda di esaki, a wak e avansenan pa loke ta e cuido basico forensico, di cual manera ta conoci, tin diferente palabracionnan bilateral cu Hulanda cual a wordo haci riba e tematica aki. Adicionalmente, den cuadro di e Justitieel Vierpartijenoverleg (JVO), e cuido forensico cu nos mester brinda na detenido y hobennan ta un topico di suma importancia. E aspecto aki, mas y mas ta wordo treci padilanti den rapportnan manera e rapport di CPT, pa cual motibo tin palabracionnan haci cu, a base di un proyecto piloto, nos ta bay percura pa brinda e cuido aki na un manera duradero na tur esnan cu tin mester di esaki.

Pa recapitula, e renobacionnan a keda cla, principalmente e diferente espacionan caminda e expertonan lo mester bay brinda e cuido basico forensico tambe ta cla, y awo e preparacionnan ta den ehecucion pa asina na comienso di 2024 e proyecto aki por inicia. Di e forma aki tambe ta duna atencion na e parti infrastructural como tambe e parti di personal, mirando cu e reorganisacion a keda cla. Pues, nos lo bay enfoca hopi riba e parti di cuido, cual como pais nos mester brinda na esnan cu ta cay sera, pa di e forma aki duna contenido real na e parti di resocialisacion y reintegracion.