Hospital no mester manda pashent den exterior mas pa haci e test
Hospital prome den Caribe Hulandes pa adkiri aparato ultramoderno pa test pulmon

ORANJESTAD, Aruba – 22 di februari 2022: Horacio Oduber Hospital a adkiri e mashin di mas nobo y moderno pa haci diferente test di pulmon, esta e Vyntus BODY. Drs. Caroline Becker, specialista di pulmon, a splica cu e aparato aki por haci hopi mas compara cu loke tabatin. Pa basta tempo nan ta wardando riba e mashin aki y ta hopi contento cu el a yega finalmente. Hasta den e region di Caribe e aparato aki ta unico pues Hospital Aruba ta e prome pa adkiri e aparato y cu esaki no tin mester di manda pashent den exterior mas pa haci e testnan.

Antes e analista na departamento di Functie tabata haci testnan simpel pa mira e funcion dje pulmon. Pero cu e aparato nobo y moderno aki, brinda cuido na pashentnan cu tin reto cu nan pulmon ta bira mas extenso y eficiente pa un miho diagnosis. Esaki ta haci cu tur pashent cu ta riba e lista di espera pa haci e tipo di testnan aki, lo haya un yamada pronto. E mashin ta na HOH caba y awo nos mes por cuminsa haci varios tipo di test pa yega na un diagnostico mas preciso.

E aparato aki no ta mas facil pa uza, pero si mas extenso unda cu por diagnostica mas enfermedad cu ne. Tambe awo por haci cierto test aki na Aruba mes, di cual antes mester a manda pashent den exterior. Cu esaki por evita haci esey y asina spaar den loke ta gastonan di vuelo, estadia, cuido den exterior etc. Dokter Becker a sigura pashent cu e tempo di espera awor lo bira menos tambe.

Jessique Kelly, studiante longfunctie analist, a conta su experiencia cu e mashin di pulmon nobo ora a cuminsa uz’e riba e prome pashentnan cu tabata bastante facil, pasobra e mashin ta “user-friendly, segun el a enfatisa.
E compania Vyaire Medical di e Vyntus BODY a manda personal Aruba pa educa e personal local con e aparato ta funciona y kico por spera di dje den cuadro di diagnostico riba pulmon di pashentnan. Durante un siman intensivo a siña e personal di hospital di Aruba con pa traha cu e aparato nobo aki. E mashin ta bay den hopi detaye mustrando claramente con tecnologia moderno ta tumando over mas y mas trabou di loke antes e wowo humano mester a haci.

Janine Kaspers, representante di Vyaire Medical, a percura p’e parti di instalacion, mientras su colega Rene Jacobs, kende ta un tecnico, tabata arma e aparato. Cu e Vyntus BODY e pashent no mester sinta den e box, pero tin posibilidad pa midi sinta pafo tambe. Ademas, e box ta mas abou cu ta hacie mas facil pa pashent cu tin dificultad di cana. E box ta haci uzo di un ultrasound, cual ta e sensor mas nobo cu tin y midimento ta hinca den e plafond. E box ta cera cu glas y tambe tin magneet cu ta sigura calidad di higiena y e sistema ‘dubbele druk’ ta garantisa cu no tin influencia di pafo riba esun paden.

Di e forma aki por mira cu, a pesar di pandemia y retonan den cuido, Horacio Oduber Hospital ta sigui inverti y inova cu aparatonan mas moderno den un esfuerso pa por brinda mas y miho cuido na pashent. E ta yena Aruba cu hopi orguyo pa sa cu nos tin e aparato di mas modern cu hasta lo por ofrece e servicio aki na otro pashentnan den nos region. Cu esaki ta keda demostra cu Hospital su prioridad ta e pashent.