Cft: “Probecha e recuperacion economico pa pone e presupuesto na ordo”

Philipsburg – E entradanan di impuesto di Sint Maarten ta keda atrasa compara cu e crecemento economico. Pa aña 2022 a pesar di un crecemento economico real di 12 prociento, e pais ta spera un deficit prespuestario significativo. Cft ta urgi e pais pa limita gasto y aumenta e entradanan di impuesto mediante medidanan pa mehora cumplimento cu deber di impuesto. Por ehempel, introduccion di impuesto di casino, eliminacion di dispensacion di impuesto riba benta di mercancia na momento di importa lo ta un bon comienso.

E economia ta recuperando significativamente. E economia di Sint Maarten a crece cu un 4 porciento na aña 2021 y pa e aña aki IMF ta spera un crecemento di 12 porciento. Esaki ta debi pa un parti na e restauracion di turismo y pa e otro parti na e aceleracion di e trabounan di reparacion, como e reconstruccion di e aeropuerto. Tambe ta spera cu e inversionnan priva ta acelera significativamente den aña 2022. Sint Maarten mester probecha e recuperacion economico aki pa pone ordo den su finansa publico.

Presupuesto 2022 y proximo añanan
Sint Maarten a ricibi 4 di februari ultimo, e aprobacion di Conseho di Minister di Reino pa desvia di e normanan central di e presupuesto di aña 2022. E presupuesto aproba pa aña 2022 ta mustra un deficit di ANG 124 miyon riba e servicio regular. Sint Maarten por logra un deficit mas abou door di reduci awo e gastonan y door di aumenta e ingreso di impuesto. Pa loke ta trata e gastonan Cft ta urgi muy particularmente pa reduci esakinan riba mercancia y servicio. Cft ta pone enfasis riba e importancia pa logra un ekilibrio riba e servicio regular pa aña 2023 y un surplus pa e añanan proximo di manera cu Sint Maarten por cuminsa na paga su debe publico. Sint Maarten mester paga den aña 2025 un prestamo di ANG 73.5 miyon, cu ainda Sint Maarten tin di e restructuracion di e debe di aña 2010. Ademas ta importante pa Sint Maarten splica suficientemente su inversionnan previsto den e presupuesto di aña 2022 y pa e añanan proximo. Den consulta cu Hulanda mester evalua si Sint Maarten por solicita pa prestamo pa inversion di capital cu anticipacion di e saldo di e servicio regular den aña 2023.

Aumento di entrada di impuesto
Mira internacionalmente, e entradanan di impuesto na Sint Maarten, cual ta aproximadamente 20 porciento di e producto interno bruto (bbp), ta abou. Esaki ta preocupante ya cu Sint Maarten no ta genera ingreso suficiente pa cubri e gastonan anual y pa genera un surplus. P’esey ta importante cu Sint Maarten mester implimenta e recomendacionnan den e informenan di impuesto di IMF di maart 2021 riba e reformanan di impuesto riba termino cortico. Cft ta conseha e implementacion di e recomendacionnan riba impuesto di casino, aumento di e accijns y introduccion di derecho di importacion riba mercancia. Actualmente, personanan priva na Sint Maarten ta haya dispensacion di impuesto ora di importacion di producto. Esaki ta un situacion indeseabel pasobra e personanan priva aki awor ta haci nan compra “online”, loke ta haci cu Sint Maarten ta perde ingreso riba impuesto.

Control riba subsidio salarial
Sint Maarten ta kedando atrasa den e determinacion di subsidio salarial cu a keda duna den e añanan 2020 y 2021. Durante e combersacionnan Cft a enfatisa un biaha mas cu mester tuma e determinacion definitivo pa mas pronto posibel y cuminsa cobra e subsidio salarial excesivo cu e personanan a ricibi. Na aña 2020, Sint Maarten a paga ANG 72 miyon na subsidio salarial na e empresanan. Pa aña 2021, Sint Maarten ta spera di paga aproximadamente ANG 31 miyon na gasto di subsidio salarial. Cft a pidi e Minister di Finansa pa completa e control riba e programa di gastonan di subsidio salarial pa aña 2020 y 2021 riba 1 di april y 1 di mei 2022 respectivamente.
Fondo di atencion medico
E situacion financiero di e fondonan medico na Sint Maarten ta insostenibel. Sint Maarten mester aumenta den un tempo cortico e limite salarial di e fondo di atencion medico y/of e fondo di accidente na ANG 120.000. E contribucion di e empleadonan di e sector publico tambe mester ahusta mas na esun den sector priva y mandatarionan político mester contribui na e fondo di seguro di salud. Cft ta enfatisa atrobe e importancia pa substitui medicamento specifico pa medicamento generico. Esaki ta permiti Sint Maarten economisa un cantidad anual di a lo menos ANG 6 miyon.

Administracion financiero
E administracion financiero di Sint Maarten ta keda considerablemente insuficiente ya pa varios aña. Cft ta positivo riba e atencion cu e administracion financiero cu ta duna den e “Landspakket” y ta enfatisa e importancia di mehora e administracion den cooperacion cu COHO i.o. Ta necesario mas pronto posibel finalisa e discusion cu Hulanda pa pone sosten pa e programa na disposicion, di manera cu Sint Maarten por cuminsa cu e proyecto. Cft ta insisti tambe cu mester cumpli minuciosamente cu e acuerdonan haci riba e cuentanan anual.

E miembronan di Cft Curaçao y Sint Maarten a papia virtualmente cu Gobernado, Prome Minister, Minister di Finansa, Minister di Salud, Asuntonan Social y Trabou y e Comision Financiero di Parlamento di Sint Maarten. Cft a papia tambe cu e Asociacion di Hospitalidad y Comercio di Sint Maarten (SHTA) y Gerencia di Seguro Social di Gastunan Medico (SZV).

Riba 21 di februari ultimo Cft Bonaire, Sint Eustatius y Saba a papia virtualmente cu e Comisario interino di Gobierno y e Hefe di Finansa di Sint Eustatius.

Recientemente, dos miembro nobo a uni nan mes na e Colegio di supervision financiero, esta señora Julisa Frans como miembro di Cft Corsou y Sint Maarten riba recomendacion di Sint Maarten, y señor Hans Hoogervorst como miembro riba recomendacion di Hulanda pa Colegio di supervision financiero di Aruba, Cft Corsou y Sint Maarten y Cft BES.