A recomenda Elizabeth de Cuba como miembro di Colegio di supervision financiero di Corsou y Sint Maarten
Willemstad/Den Haag – Conseho di Ministro di Reino, a bay di acuerdo cu e recomendacion di Corsou pa nombra señora J.E. (Elizabeth) de Cuba como miembro di Colegio di supervision financiero di Corsou y Sint Maarten (Cft).
Elizabeth de Cuba a nace y crece na Aruba y ta biba na Corsou desde 2010. Despues di a termina su Maestria den Economics & Business na Universidad Erasmus na Rotterdam y su estudio di auditor (registeraccountant), señora De Cuba a traha durante varios aña como director di auditoria den e departamento di assurance di EY Dutch Caribbean. Ey el a sirbi diferente cliente local y internacional, incluyendo varios institucion financiero.
Di 2017 te 2022, señora De Cuba, entretanto director asocia (associate director), a traha den e Grupo de Practica Profesional (Professional Practice Group) di EY Caribbean. Den esaki e tawata corresponsabel pa, entre otro, maneho di calidad. Den e calidad aki, el a traha estrechamente cu auditor di entre otro Trinidad & Tobago, Jamaica, Barbados, Saint Lucia y Surnam. Ademas, señora De Cuba tawata docente di e materia Auditing na University of Curaçao di 2018 te 2020 pa e studiantenan cu tawata sigui e programa di Master den Accountancy & Controlling. Actualmente e ta dirigi su propio empresa specialisa den Accounting, Auditing y Finance.
E nombramento di señora Elizabeth de Cuba como miembro di Cft lo drenta na vigor entrante 1 di october di 2023. Asina e ta sucede señor Gregory Damoen, cu tawata miembro di Cft pa Corsou durante dos termino desde 2017.
Señora Lidewijde Ongering ta duna di conoce di ta entusiasma di por bay colabora cu Elizabeth de Cuba: “E tin un formacion solido den e materia. Esaki ta mas cu bonbini”.
Colegio di supervision financiero di Corsou y Sint Maarten ta consisti actualmente, banda di e presidente señora Lidewijde Ongering, di Hans Hoogervorst (miembro di Hulanda), señora Julisa Frans (miembro di Sint Maarten) y e miembro saliente (miembro di Corsou) Gregory Damoen. Cft lo bishita Corsou y Sint Maarten, pa prome biaha den su constelacion nobo, na luna di october proximo.