Minister Dangui Oduber : SIMAN PASA TABATA UN SIMAN GRANDI Y PRODUCTIVO PA MINISTERIO DI TURISMO Y SALUD PUBLICO

ORANJESTAD – Siman pasa tabata un siman hopi ocupa pa Ministerio di Turismo y Salud Publico. Un siman caminda a celebra dia mundial di turismo, a duna inicio na e simposio di cuido di herida. Tambe e mandatario a presencia e comienso di e workshop di “Product Development” cu a wordo duna na e “Tour Operator” nan.

Dia 27 di september tabata Dia Mundial di Turismo. Riba e dia aki Minister Oduber a atende e conferencia di di dia mundial di turismo caminda e la duna un discurso. E tabata un dia di reflexion, caminda ta renoba e compromiso pa cu e profesionalismo den e sector. Minister Oduber a gradici cada un persona cu ta traha den e sector di turismo. Tur e partnernan den turismo, tur empleado y tambe departamento di gobierno.

Siman pasa a tuma lugar e di #6 simposio riba cuido di herida caminda Minister Oduber a hiba algun palabra. E tabata un simposio importante caminda profesionalnan di Caribe y Estados Unidos a bini hunto pa comparti nan conocemento riba cuido di herida.

Un simposio cu a wordo organisa pa Dr. Yuri Casseres di “Center For Advanced Wound Care” (CAWC)(ex Wonden Poli) na HOH y tambe na ImSan. E nivel di cuido di CAWC ta e mas halto den Caribe Hulandes. Actualmente e centro tin entre 17 pa 20 mil consulta pa aña.

Siman pasa tambe Minister Oduber a presencia e comienso di e workshop “Product Development” duna pa ATA y APA. Un workshop di 2 dia di entrenamento pa e “tour operators”. Aki nan a haya sa mas di aspecto di servicio, nan lo conoce di serca e maneho y vision di Ministerio di Turismo. Tambe nan a haya sa di tur e proyectonan cu ta den ehecucion. Nan a haya un bista di tur e inversionnan cu ta wordo haci pa Ministerio di Turismo, APA y ATA. Inversionnan den cuadro di mehoracion di producto Aruba.

Minister Oduber ta sigui traha pa bin cu desaroyonan grandi y importante pa Aruba.