Gobierno Reino

Aruba ta den cumplimento cu tur condicion:
ARUBA TA HAYA 12 MIYON FLORIN SOSTEN DI LIKIDES PA PROME KWARTAAL 2022

Den reunion di Conseho di Minister di Reino awe 25 februari, Aruba su peticion pa sosten di likides a wordo aproba, 12 miyon florin pa e prome kwartaal di 2022. Aruba ta den cumplimento cu tur e condicionnan.

Advertisements

Inicialmente Aruba a haci un peticion pa un suma mas halto. Sinembargo, na comienso di aña nos tabata tin placa ainda riba cuenta di pais Aruba, y Caft a conclui cu nos no mester di full e suma. E placa cu tabata tin na comienso di aña riba cuenta di pais Aruba, tabata debi na atrasonan den pago di luna di december, y no tabata placa destina pa januari. A trata na splica Caft pero sin resultado.

Gobierno di Aruba ta hopi satisfecho cu e suma aki, cu ta yuda den pago di e cuentanan pa e prome kwartaal pa 2022.

Tranche kwartaal 2, 2022
Awor ta cuminsa e trabounan pa peticion di sosten di likides pa e di dos kwartaal. Den reunion di Conseho di Minister di Reino awe mainta, ya caba a anticipa cu pa e di dos kwartaal Hulanda kier conseho di Caft riba algun otro punto, por ehempel:

  • Cuanto di e placa di Loonsubsidie cu a wordo paga dimas, a wordo cobra bek; aki na Aruba companianan a cobra 124 miyon florin dimas, parti a wordo paga caba, pero ainda falta pa cobra 113 miyon florin.
  • Status di presupuesto 2022, na Aruba esaki a wordo entrega a Parlamento e siman aki, y ta wordo spera cu prome cu e siguiente peticion di sosten di likides, esaki lo wordo trata den Parlamento.
  • Recortenan structural den gastonan di AZV, pues aki lo midi con efectivo AZV tabata y lo ta den e recortenan.
  • Con Aruba ta avansando den ehecucion di e Landspakket; pa cu esaki no ta premira problema, mirando cu Aruba ta den cumplimento cu e condicionnan.
    Probablemente lo pone un, mas of tur e puntonan aki como condicion pa e siguiente tranche di sosten di likides. E siguiente tranche ta sumamente importante pasobra den e tranche ey tin e placa cu Gobierno ta presta pa por paga e mita vakantie uitkering na empleadonan publico. Gobierno di Aruba ta bay traha riba esaki diligentemente y ta conta riba sosten y cooperacion di comunidad den esaki.
    Pabien Aruba, cu e sosten di likides aki. Awor nos por sigui traha na recuperacion di nos pais.