Noticia

MINISTER ENDY CROES TA DESEA E ATLETANAN CU TA BAY REPRESENTAARUBA DEN JUEGOS PANAMERICANOS 2023 NA SANTIAGO, CHILE HOPI EXITO

COA a realisa un bunita ceremonia pa e 14 atletanan di Team Aruba.

Advertisements

ORANJESTAD: Diabierna ultimo, Minister di Enseñansa y Deporte Endy Croes tabata
presente na e oficina di Comite Olimpico Arubano pa despedi di e 14 atletanan cu ta
biahando na Santiago, Chile. E atletanan aki ta bay competi den Juegos Panamericanos 2023
di 20 di october pa 5 di november 2023, unda cu 7 mil atleta di 41 pais den 39 diferente
deporte ta participando, entre otro, landamento sincronico, landamento, bowling, windsurfing
y shooting. Durante e ceremonia, Minister Endy Croes a hiba palabra pa desea e atletanan
exito y recorda nan e importancia di aplica e balornan olimpico. Ademas di esaki, Sra. Nicole
Hoevertsz, Presidente di COA y vice presidente internacional di Weganan Olimpico a hiba
palabra y a gradici Minister Endy Croes pa su colaboracion cu COA. Sra. Wanda Broeksema
secretaria general di COA, a presenta Minister Endy Croes e pin oficial di Juegos
Panamericanos 2023. Durante e ocasion special aki, Sr. Jonathan Wever a haci un tremendo
presentacion di e Juegos Panamericanos 2023. Tambe, e atletanan a haci un desfile di e
uniform cu nan lo uza durante e comptencia na Chile. Sra. Nicole Hoevertsz a regala Minister
Endy Croes e uniform oficial cu Team Aruba ta bay luci na Chile, patronisa pa Totto Aruba.
Fuera di esaki, e anochi aki Royal Aloe Blue a bira un stakeholder di COA y e
representantenan a duna un discurso. Ademas durante e ceremonia a inaugura e billboard
grandi di Juegos Panamericanos 2023. Minister Endy Croes ta gradici e team cu tin varios
tempo ta preparando e atletanan pa bay representa nos isla dignamente. Alabes, ta desea e
atletanan hopi exito den Juegos Panamericanos 2023 na Chile. Balornan olimpico manera
excelencia, amistad y respet ta esencial pa ta exitoso y aplicando e 4D-nan di deporte, cual ta
disciplina, deseo, dedicacion y determinacion. Finalmente, e mandatario di Deporte ta gradici
tur stakeholder, manera Stichting Sportsubsidie Aruba (SSA) y Fundacion Lotto pa Deporte
(FLPD) cu a aporta pa por a hiba e atletanan den exterior.