MINISTER ENDY CROES Y MINISTER GEOFFREY WEVER A LANSA E PROYECTO SPORT ENTREPENEURSHIP

ORANJESTAD: Dialuna atardi, durante Conferencia di Prensa di Gobierno di Aruba, Minister Endy Croes y Minister Geoffrey Wever a lansa a proyecto Sport Entrepreneurship. E tayer aki ta dedica na tur esnan cu ta desea di dedica na un actividad di deporte den un forma comercial. E tayer ta delinea un iniciativa strategico pa promove e actividadnan comercial den deporte door di cultiva un cultura caminda deporte y negoshi ta crusa otro. Door di crea un serie di tayer dirigi pa e interesadonan den e sector aki, e proyecto aki tin como meta pa sostene un grupo cu tin entusiasmo den e industria di deporte cu ta cla pa haci un impacto riba economia di Aruba y den region. E meta di e proyecto aki ta pa e personanan haya e materia, conocemento, y mentalidad necesario pa haci nan pasion den deporte crece y haci di esaki un actividad comercial exitoso. Door di promove innovacion, crecemento economico y un desaroyo di capacidad profesional, e proyecto aki lo contribui na e evolucion di e industria deportivo y crea un panorama mas dinamico y vibrante pa e negoshinan relaciona cu deporte.

Dia di 30 october proximo, Departamento di Asuntonan Economico, Comercio y Industria (DAECI) mediante su unidad di Iniciativa pa Desaroyo di Empresa Arubano (IDEA), ta presenta e proyecto Sport Entrepreneurship. E proyecto ta wordo organisa den colaboracion cu Ministerio di Economia, Comunicacion y Desaroyo Sostenibel y Ministerio di Enseñansa y Deporte. E proyecto lo duna informacion di kico Sport Entrepreneurship ta encera, su alcance y e tendencianan actual den e industria aki. Tambe, lo trata diferente manera cu por identifica e oportunidadnan di negoshi den e industria deportivo. E participantenan lo siña con pa crea un plan di mercadeo y di benta pa nan negoshi relaciona cu deporte. Lo trata tur loke ta relaciona cu maneho di financia den negoshi, incluyendo presupuesto, pronostico, y recordnan financiero. Tambe, lo haci un repaso completo di e asuntonan legal y etico relaciona cu Sport Entrepreneurship. Adicionalmente, lo trata e uzo di tecnologia y innovacion. Lo pone enfasis riba e habilidadnan di liderazgo y ehercicio di “teambuilding” pa yuda e participantenan crece den nan negoshi. Lo trata e importancia di sostenibilidad y responsabilidad di medio ambiente den Sport Entrepreneurship. Na final e participantenan por desaroya e conocemento y habilidadnan necesario pa integra e oportunidadnan di turismo deportivo den nan proyectonan di Sport Entrepreneurship. Esaki por inclui, start un agencia di biahe pa deporte, organisa e eventonan pa turista relaciona cu deporte of promove e eventonan deportivo como atraccion pa turista.

E proyecto ta cuminsa dia 30 di october y ta termina den luna di februari 2024. E ta consisti di un total di 9 topico, 18 tayer y 24 sesion. E lesnan lo tuma luga 2 bes pa siman di 7 pm – 9 pm di anochi. E costo pa participante ta AWG. 175. Na final e participante lo ricibi un certificado cu ta reconoce nan participacion activo y completo na tur e tayernan. Mientras, cu ta explora den e industria deportivo, ta mira un futuro unda innovacion y crecemento economico ta crusa otro y ta forma un parti integral den e mundo di deporte. E proyecto aki no solamente ta pa fortalece e participantenan, pero tambe pa duna un aporte significante na prosperidad economico di nos pais, door di fomenta “entrepreneurship”, promove colaboracion y cultiva perspectivanan fresco. Gobierno di Aruba tin como meta di haci un impacto duradero tanto riba e industria deportivo y economia en general. Pa conclui, Minister Endy Croes ta invita tur esnan cu ta activo den deporte pa participa na e proyecto aki cu ta brinda oportunidad unico cu lo yuda forma nan mes.