Minister Endy Croes: TA LANSA PROYECTO MUSICAL THE SCHOOL TOUR PA E HOBENNAN DI SCOL SECUNDARIO

E meta di e proyecto aki ta pa pa crea conscientisacion di salud mental y cuido personal na scol secundario.

ORANJESTAD: Diaranson ultimo, durante Conferencia di Prensa di Gobierno di Aruba Minister di Enseñansa y Deporte Endy Croes hunto cu cantante Sr. Levie Silvanie, cantante Sr. Janiro Eisden y Sra. Dalgis Montalvo di Geestelijke Gezondheidszorg Aruba (GGZ) a anuncia e lansamento di The School Tour. The School Tour ta un proyecto musical cu e meta di crea conscientisacion di salud mental y cuido personal enfoca riba e hobennan di scol secundario. Sr. Silvanie ta un artista hopi popular di Curaçao cu ta residencia na Hulanda. Despues di dies (10) aña Sr. Silvanie ta bolbe cu un album y vision nobo, uzando su musica y storia pa pa yuda e hobennan cu ta pasa den diferente problema di salud mental. Dia 16, 17 y 18 di october e alumnonan di Colegio Arubano, Filomena College y Maria College lo ta e tres (3) prome scolnan cu lo ta acudiendo na e sesionnan di The School Tour.  E idea di esaki ta pa saca e alumnonan di scol y hiba nan den un otro ambiente, unda cu nan por sinti sigur. Alrededor di 300 hoben di scol secundario lo ta participando den e proyecto aki, unda cu den cada sesion e cantante Levi Silvanie lo conta su propio storia a traves di musica pa encurasha e hobennan pa expresa nan mes. Durante cada sesion un ekipo di profesional lo duna e hobennan informacion tocante salud mental y cuido personal y con por mantene un estado mental saludabel. Ademas di sesion pa e hobennan di scol secundario, lo tin un evento parti anochi riba e tres (3) dianan aki na John F. Kennedy Education Center Aruba di 7:00 pm pa 10:30 pm. Dia 16 di october ta enfoca riba e hende hombernan, dia 17 di october riba e educado- y mayornan y dia 18 di october lo tin un “open panel conversation” cu tur stakeholder pa hunto trece solucion practico pa e situacion di salud mental aki na Aruba. Sr. Silvanie a expresa cu alrededor di tres (3) aña atras el a sinti cu su proximo proyecto musical mester tin un mision diferente, unda cu a traves di musica e por yuda otro hendenan a base di su propio experencia personal. Sr. Silvanie ta gradici Gobierno di Aruba cu ta e prome isla cu a brasa e proyecto bunita aki y ta invita henter Pueblo di Aruba pa acudi na e eventonan aki otro siman. Pa finalisa, Minister Endy Croes ta gradici colega Minister Rocco Tjon cu tambe ta forma parti di e proyecto aki y na henter e ekipo cu ta trahando den colaboracion pa realisa e bunita proyecto aki, esta Sr. Levi Silvanie, Sr. Friso Veenman, Sr. Janiro Eisden, GGZ y tur stakeholder. Despues di e edicion aki lo haci un evaluacion di e proyecto The School Tour pa analisa locual mester mehora pa sigui brinda mas hoben e posibilidad di participa den e proyecto aki.