Parlamentario Darlaine Guedez-Erasmus (MEP): Palabranan di gradicimento na Harry Croes pa tur cos cu el a haci pa Aruba

ORANJESTAD, Aruba 16 di october 2023: Riba Dialuna, na Cede di Partido MEP a rindi un homenahe na un baluarte di Aruba, esta Sr. Harry Croes. Den cuadro di esaki, Parlamentario Darlaine Guedez-Erasmus a hiba palabra durante conferencia di prensa di Fraccion di MEP.

E Parlamentario a expresa cu dialuna tabata e dia caminda a tuma despedida di un gran amigo, Harry Croes. “Un persona asina humilde, di bon curason. Amigo di tur hende”.

E tabata un hende masha stima mes den e pueblo di Aruba. Un Arubiano 100 %, un Arubiano di curason. Ora cu a acerc’e e tabata cla pa yuda, e Parlamentario a manifesta.        

El a haci referencia na un di e eventonan na Club Caiquetio na Paradera unda tabata tin e muchanan di Paradera cu a bay scucha e actividad di Himno y Bandera. Semper Harry tabata cla pa duna informacion na e muchanan. Mustra nan e pasion y stimacion cu nan mester tin pa Aruba. Esey tabata un di e pasionnan di Harry, a bisa.

Guedez-Erasmus a agrega cu esey tambe por a mira diadomingo durante e actividad cu a wordo teni pa brind’e tributo y gradici Harry Croes pa tur e aporte cu el a duna.

Gobierno di Aruba a organisa un bunita anochi p’e. Por a mira gruponan di Dande Folklore tabata presente.  “Ami tambe tabata presente diadomingo anochi y nos por a mira hopi emocion y vooral ora di toca e dande unda nos por a mira rey y reina, tur presente pa asina deleita cu un bunita dande na Harry. Tur presente sigur a demostra e cariño sincero cu nan tin pa Harry”, a expresa.

Finalmente, Darlaine Guedez-Erasmus a gradici Harry di curason tur cos cu el a haci pa Aruba y con el a stima Aruba y mustra comunidad con tin cu sigui stima nan pais.