Minister Xiomara Maduro ta invita pa sintonisa otro programa informativo interesante

‘Dialogo tocante efectonan di sclavitud y colonialismo na Aruba’

Den cuadro di e Serie di Programa Informativo di Historia di Sclavitud na Aruba

Despues di a presenta varios programa informativo pa conscientisa nos comunidad tocante e Historia di Sclavitud na Aruba, Ministerio di Cultura ta presenta e biaha aki un dialogo tocante e efectonan di sclavitud y colonialismo na Aruba. E programa aki ta consisti di dos parti y tin un duracion di un ora.

Den e prome parti sra. Indra Zaandam ta hiba un combersacion habri cu tres profesional sra. Aleida Hector, sr. Chando Pietersz y sr. Edric Croes,  tocante e efectonan duradero di sclavitud y colonialismo na Aruba y lo haci esaki for di tres diferente perspectiva. Lo trata e efecto di sclavitud y historia colonial riba nos sistema democratico,  nos sistema di enseñansa y tambe e efecto riba e imagen propio y beyesa.

Minister Xiomara Maduro ta extende un invitacion na henter comunidad pa sintonisa e programa ‘Dialogo tocante efectonan di sclavitud y colonialismo na Aruba’.

E programa lo pasa diahuebs dia 19 di october pa 9’or di anochi na Telearuba y diabierna dia 20 di october pa 9.10 di anochi na Diario tv.