Minister Rocco Tjon: SALUD MENTAL TA HAYA SU DEBIDO ATENCION CU TOUR EDUCATIVO DI ARTISTA MUSICAL LEVI SILVANIE
ORANJESTAD – Diaranson anochi, na centro educativo JFK a tuma luga e clausura di e tour di Levi Silvanie, pa loke ta trata Salud Mental. Manera ta conoci el a presenta un forma cu a traves di musica ta papia principalmente cu e mucha y hobennan riba e tematica di salud mental. E tour a wordo a clausura a traves di un panel di discusion riba e topico di salud mental, caminda tur e stakeholders cu tin un rol importante pa atende cu e tematica di salud mental tawata presente pa asina brinda informacion na e publico, pero tambe pa contesta pregunta di e publico.
Un iniciativa sumamente positivo, mirando cu dia pa dia salud mental ta un di e puntonan cu mas ta keda bin padilanti, di cual como pais, nos mester keda percura cu esaki ta haya su debido atencion, pa asina kibra e stigma cu tin actualmente, y haci’e un “kitchen table topic”, pa asina hende no mester sinti nan mes bergonsoso pa busca e ayudo necesario.Iniciativanan manera esun di Levi Silvanie, ta algo cu ta percura pa e topico aki ta uno cu ta keda haya su debido atencion.
Importante pa menciona ta cu Aruba tin un roadmap, caminda te cu 2030 ta defini kico ta e seis pilarnan riba cual nos kier traha y enfoka. Banda di esaki tambe a lanta e stuurgroep GGZ, cu ta ehecuta e plan di accion pa duna realse na e roadmap aki.
Por ultimo, minister di Husticia y Asuntonan Social sr. Rocco Tjon, a expresa cu e ta sumamente satisfecho di por a forma parti di e iniciativa aki di e artista musical Levi Silvanie, caminda a conta cu presencia di tur stakeholder pa cu salud mental na e clausura di e tour educativo aki, y a haya e oportunidad pa informa comunidad riba e retonan cu nos ta wordo confronta cune, y con Aruba como pais ta atende cu e tematica aki. Palabranan di pabien na Levi Silvanie y henter e ekipo y stakeholders cu a haci e evento aki posibel, trahando semper na e bienestar di nos comunidad.
