Noticia

Parlamentario Darlaine Guedez-Erasmus (MEP) ta felicita Ministerio di Husticia y Asuntonan Social cu apertura di loket Plan di Mayor

“Ta hopi importante pa den e bida di e mucha, tata y mama ta presente”

ORANJESTAD, Aruba 23 di October 2023: Dialuna atardi tabata tin e ‘soft opening’ di e loket di Plan di Mayor na Centro di Hoben y Famia na Sabana Blanco y den cuadro di e evento aki, Parlamentario di Fraccion di MEP, Darlaine Guedez-Erasmus a expresa cu esaki ta un dia importante ya cu e loket lo haya su lugar cu su profesionalnan.

Advertisements

E Parlamentario a sigui bisa cu pa algun tempo caba e preparacionnan ta andando hunto cu e Ley di Plan di Mayor. Plan di Mayor ta encera un ley caminda despues di un separacion, mama y tata tin cu bini hunto pa asina traha un plan, cu nan yiu central, pa wak con nan ta bay sigui cu e cuido y educacion di nan yiu.

+

Pa cu esaki ta haci palabracionnan grandi te cu cosnan chikito cu tin di haber cu e bienestar di e mucha of hoben, a indica.“Como Parlamentario mi ta haya e plan aki hopi importante pasobra den nos comunidad lamentablemente hopi pareha ta separa y hopi biaha nos ta mira cu nan no sa con pa sigui, con pa tuma e responsabilidad”, Guedez-Erasmus a expresa.

E ta haya e proyecto aki asina importante cu mester sigui cu su avancenan. E ta elogia e profesionalnan, cu ta rond di 70 profesional cu a yuda pa haci e proyecto aki un realidad. Den e loket, e profesionalnan awor por coordina con tur cos ta bay. Banda di esaki, Universidad di Utrecht na Hulanda lo duna un ayudo na e grupo meta pa saca e miho di e proyecto aki y keda haci evaluacion.

“Mi kier gradici Michella Steenwoorde-Lacle pa su tremendo dedicacion pasobra desde un inicio cu el duna idea y a traha hunto cu e otro profesionalnan pa logra esaki”, a bisa. E ta admira su perseverancia den esaki y cu awo por mira cu e loket Plan di Mayor ta bira un realidad.

Na Parlamento e ley tey. E ta cla pa trata, fecha exacto no tin ainda, pero ta pendiente pa esaki tuma luga. Ta hopi importante pa den e bida di e mucha, tata y mama ta presente y ni kico cu pasa e mucha mester keda central y esey ta e punto di atencion, Parlamentario Guedez-Erasmus a duna di conoce durante e rueda di prensa di Fraccion di MEP, dialuna mainta.