Minister Maduro a reuni cu CAFT pa repasa e trabounan cu ta wordo haci pa mehora e finansa publico di Aruba

Trabou serio y den ekipo ta dunando su fruto

Siman pasa diabierna Minister di Finansa y su ekipo a reuni cu e colegio di CAFT pa repasa e trabounan cu ta wordo haci pa asina por mehora e finansa publico di Aruba. Durante e reunion a trata topiconan manera, Presupuesto 2023 y 2024, raportahe financiero di cada kwartaal, Cuenta Anual 2019, entrada y cumplimento cu impuesto. Mester bisa cu e colegio di supervision financiero tabata tin elogio pa e manera serio con ta manehando e finansa publico di Aruba, den cual ta logra pa structura e proceso presupuestario, ta logra cambia e panorama financiero di deficit pa surplus, ta logra baha e crecemento di debe, y ta logra yega na e fondonan pa inversionnan necesario pa comunidad por wordo haci. Ta logronan importante pa Pais Aruba cu ta refleha un maneho financiero serio. Minister Maduro di Finansa ta  gradici tur Aruba su profesionalnan cu ta traha incansablemente pa logra bienestar pa Aruba. Ta danki na e trabou profesional den ekipo y cu Aruba semper na pecho, awe nos por mira e fruto di e esfuerso grandi haci pa hiba Aruba di un situacion di un menasa di un KB, pa un situacion unda CAFT tin elogio pa e trabounan haci pa fortifica e finansa publico di Aruba.