Parlamentario Marco Berlis (MEP): E cashi habri di Mike Eman

ORANJESTAD, Aruba 25 October 2023: Algun dia pasa sr. Mike Eman lider di AVP un biaha mas den su desesperacion a cuminsa papia “barbaridad comun” na un noticiero local. Mike Eman, cu ta ausente pa 44% di tur reunionan publico segun rapport di Parlamento, ta liderando un partido kibra, bergonsa y exponi como corupto pa su mesun ex-candidato y parlamentarionan. E entrevista den prensa a demostra claramente cu Mike Eman a perde tur nocion di realidad y no ta realisa den ki estado su consenshi y partido ta.

Mike Eman ta insinua loke ta un realidad pa su mesun partido

E lider di AVP tabata papia di ex-minister Plenipotenciario di Hulanda sr.Guilfred Besaril, cu a caba di perde su caso contra gobierno. Mike a bisa cu si e cashi di MEP habri, cuminsando na Minister President Evelyn bin abao lo mustra cu tur ta corupto. Asina Mike Eman a insinua y indica cu cada un candidato riba e lista ta culpabel di corupcion. Ta bisto cu Mike su expresionan a perde tur gevoel y consenshi, mientras su propio partido kibra a caba di pasa den un exodus pa via di e mentiranan, maltrato, ofensa y corupcion cu ta reina den AVP. Un partido cu ta defende esnan cu ta haci malo, cu a malusa nan poder den gobierno y a wordo condena pa huesnan, pero celebra pa AVP como heroenan. Mike Eman y e old boys network ta keda punta dede riba otro mientras tur hues ta punta dede riba AVP. Esaki ta e “bon comun” cu Mike ta papia di dje? 

E cashi habri di Mike Eman

Tin poco argumento cu a resta Mike Eman pa purba sigui gaña pueblo, pa trata na convence cu tur otro hende ta corupto menos AVP. Mike a demostra cu e no por lidera su partido y a laga su cashi hancho habri pa tur hende wak e realidad di e partido berde. Mike no tin ningun remordimiento, ni a pidi un despensa na pueblo pa e corupcion y dolor cu su ex-ministernan sentencia a causa den pueblo. Mas bien e strategia awor ta pa desvia atencion di e realidad cu a wordo exponi pa su mesun hendenan di confiansa. Mike con bo por kita un mancha asina grandi for di bo cashi? Mike su cashi ta hancho habri y a wordo husga pa hopi huesnan. Pueblo a scucha, lesa y wak e corupcion den AVP. Pueblo hamas ta bay lubida. Mike, bo cashi su portanan a cay, su lachinan ta kibra, y su pañanan ta corumpi!

Acusacion sin base di Mike Eman

Mike Eman di un forma baho a acusa tur candidato di MEP di corupcion. Algo cu ami no lo bisa di tur candidato di AVP. Mi por tin hopi desacuerdo cu AVP, pero pa señala tur hende di ta mes corupto cu ex-minister di AVP cu actualmente ta sintando su sentencia den KIA, ta incorecto. Cu mi ta kere cu un candidato politico cu principio y moral no por keda den AVP ta berdad, pero esey ta mi opinion y di miles di otro hende. E ta imposibel pa sigui un lider cu ta hunga “politrics” den su cashi, cu ta celebra y ainda ta “praat goed” ex-ministernan cu a horta pueblo? E ta posibel pa sigui un lider cu ta papia di e “bon comun,” pero ta maltrata, ofende, rechasa y manipula su mesun candidatonan? Gerlien bo tey? Mike, con bo ta bai hustifica e mancha y corupcion riba bo cashi? Bo no por frega e sushedad di bo cashi riba otro caminda. Esey ta e “bon comun” cu bo ta predica di dje? Finalmente, e filosofia di un lider fracasa cu un partido kibra ta obvio; “Punta dede riba otro y no wak e berdad di mi partido!”

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!