Prome Minister Evelyn Wever-Croes: Gabinete Wever-Croes ta hiba un maneho financiero responsabel

REGLA PRESUPUESTARIO TA INDICA CU ORA TA TRATA DI “MEEVALLERS”, 50% DI E PLACA MESTER BAY NA DEBE, Y 50% POR BAY NA INVERSION DEN PROYECTONAN

ORANJESTAD – Durante un conferencia di prensa extraordinario di Gobierno, Prome Minister Evelyn Wever-Croes a duna un splicacion amplio riba e regla di presupuesto den caso di “meevallers”, cu ta fondo adicional cu no a wordo anticipa. Esaki pa motibo cu oposicion ta cuestionando unda pa inverti e placa di surplus cu tin den e presupuesto supletorio 2023. Prome Minister a indica cu Aruba tin obligacionnan financiero y palabracionnan haci cu Hulanda, y na momento cu tin “meevallers”, e suma di placa ey no por wordo uza na loke Gobierno ta desea. E regla di presupuesto ta indica cu den casonan asina, minimo 50% di e placa mester bai na paga debe, y 50% por bai na inversion den proyectonan.

Pa prome biaha den historia di pais Aruba, ta encontra un situacion unda cu tin un surplus cu ta mas halto cu 1% di GDP. Despues cu departmento di finansa a actualisa e cifranan conforme nan realisacion, por mira cu e surplus a bira 1.8% di e GDP, cu ta equivalente na 50.2 miyon florin, Di e manera aki 50%, cual ta suma 25.1 miyon ta wordo destina pa paga debe, y e otro 50% ta bay pa por haci extra inversion, manera ta stipula den e reglanan presupuestario. 

Manera por scucha den prensa, oposicion ta cuestiona Gobierno riba e plannan pa inverti e placa adicional aki den diferente proyectonan. Prome Minister a indica, cu oposicion conoce e reglanan presupuestario hopi bon, y sa cu Gobierno pa regla no por inverti e placa aki den AZV, onderstand, y of salario, manera nan ta indica. Esaki ta un manera di oposicion pa crea polemica na unda no mester, paso nan sa hopi bon kico e reglanan ta. Gabinete Wever-Croes II, semper a hiba un maneho financiero responsabel, y hamas lo actua contra regla, y p’esey lo aloca e placa adicional aki, na unda regla ta stipula. Mester enfatisa si, cu pa loke ta trata inversion den proyectonan, cada un lo wordo evalua pa un comision di Departamento Economico y Departamento di Finansa, cu ta scrutina tur inversion y ta fiha un prioridad conforme necesidad.