MINISTER ENDY CROES TA BISHITA PRINSES AMALIA BASISSCHOOL EN CONEXION CU E INICIO DI PROYECTO DI LEERORKEST DI AÑA ESCOLAR 2023-2024
ORANJESTAD: Recientemente, Minister di Enseñansa y Deporte Endy Croes a bishita Prinses Amalia Basisschool pa e inicio di e bunita proyecto musical di Leerorkest. E alumnonan di aña 3 a ricibi nan prome les di Leerorkest Aruba di e instrumento cu nan mes a scoge. Nan por scoge entre seis (6) diferente instrumento, entre otro, violin, trompet, clarinet, dwarsfluit, cello of trombone. Minister Endy Croes a presencia e prome parti di les di musica di e alumnonan cu a scoge pa les di trompet, cello y clarinet. Un momento hopi special, unda cu e alumnonan a habri e tas di nan instrumento pa prome biaha y por a mira nan cara di alegria. Mas adelante Minister Endy Croes lo sigui bishita e otro scolnan pa mira e avance di e proyecto di Leerorkest y mira e desaroyo di nos muchanan cu hopi talento pa musica. Na final di aña escolar e alumnonan lo tin cu haci un presentacion musical na scol, unda cu den presencia di famia y maestronan por demostra tur locual nan a siña durante e lesnan di Leerorkest durante aña escolar 2023-2024. Esaki sigur ta un bunita proyecto di Leerorkest, unda cu Gobierno di Aruba y Hulanda ta duna sosten pa brinda e alumnonan di scol basico di Aruba e oportunidad pa haya les di musica na scol. Minister Endy Croes ta felicita Sra. Juliette van Romondt cu ta encarga cu e proyecto musical aki, tur e docentenan di Leerorkest cu ta traha cu hopi amor pa educa nos muchanan di scol basico y ta contribui den nan desaroyo. Finalmente, Minister Endy Croes ta felicita e alumnonan cu ta bay sigui e lesnan di Leerorkest y ta desea nan hopi exito.
