Parlamentario di AVP, mr. drs. Mervin Wyatt-Ras: Tripartiet ta cera cu avance y reto pa e bienestar di pueblo

E encuentro Tripartiet cu a tuma luga diamars entre islanan CAS (Corsou, Aruba y St. Maarten) a conclui parti atardi cu e di dos sesion caminda delegacionnan parlamentario a discuti topiconan manera e oportunidadnan di cooperacion den sector medico, pero tambe e consecuencia cu ta cuminsa mira for di ehecucion di Landspakket riba e islanan.

Por ehempel, tin un Vierlandenoverleg hunto cu Hulanda, bou guia di e Rijksinstituut Volksgezonheid en Milieu (RIVM). Como parti di esaki, ta trahando riba varios proyecto cu ta inclui salud mental, pero tambe preparacion pa desaster y prevencion, entre otro. A keda demostra, segun e parlamentario cu ta importante pa e paisnan traha hunto y comparti informacion.

Minister di salubridad di Sint Maarten ta di acuerdo cu Wyatt-Ras y ta laga e ultimo aki corda cu na 2015 Aruba a pone e base pa esaki durante e conferencia di cuido di salud bou di ex minister Alex Schwengle caminda a yega na palabracionnan concreto. “Awe mi ta sinti mi hopi orguyoso cu otro gobierno cu a bin ta haci uzo di locual nos a palabra,” Parlamentario Wyatt-Ras a expresa.

Sinembargo, no tur cos tabata koek en ei na e Tripartiet. Tabatin discusion mas fuerte riba e tereno fiscal, reforma di belasting como parti di Landspakketen y nan efecto den e combatimento di pobresa. E parlamentario di AVP ta sinti cu ora di encuentro na nivel di reino, algun hende ta opta pa djis papia bunita cu Hulanda. E realidad ta cu tin un pobresa creciente na Aruba y cada bes mas persona cu  no por biba cu loke nan ta haya como salario. Asina mes, miembronan di coalicion ta papia cu orguyo di e medidanan cu a tuma.

Tambe por a tuma nota cu ni Corsou, ni St. Maarten a tuma e medidanan aki. Nan a opta pa mehora e cumplimento fiscal, generando asina mas placa pa caha di gobierno. Na Aruba a neglisha e aspecto di cumplimento y djis hisa impuesto riba esunnan cu si ta cumpli cu nan obligacionnan. Riba dje, coleganan di Aruba ta reacciona ora cu kier trece e berdad dilanti, den nan afan pa defende gobierno di Evelyn Wever-Croes.

No por ehecuta e Landspakketnan ciegamente, segun Wyatt-Ras. Mester wak tambe kico e ta nifica pa e pueblo. P’esey AVP a presenta e mocion di pa institui un Sociaal Cultureel Plan Bureau cu lo conseha prome cu tuma cierto decision, riba e posibel impacto pa comunidad; en particular esunnanmas vulnerabel. Wyatt-Ras: “Asina por tuma decision di un forma mas consciente di e poblacion. Na luga di djis kier haci bunita cu Hulanda, e esencia mester keda nos poblacion, su felicidad y prosperidad.”

Por ultimo, e parlamentario di AVP a gradici e comision organisado di e Tripartiet y en particular colega Marlin di St. Maarten cu a presidi su ultimo reunion. Ta dese’e hopi exito y forsa, mescos cu na otro colega presente.