Lider di Fraccion MEP, Hendrik Tevreden ta felicita Gobierno cu a haci un tremendo trabao:

E ultimo raportahe di CAft ta e miho raportahe cu Aruba a haya te cu awo

*Gobierno lo sigui negocia pa haya un miho porcentahe di interes, sea internacional of cu Hulanda mes

ORANJESTAD, Aruba 26 october 2023: Lider di Fraccion, Hendrik Tevreden a elabora riba e ultimo raportahe di CAft durante su conferencia di prensa dialuna ultimo. Tevreden tabata tin diferente remarca y un di esakinan tabata cu CAft a indica cu Aruba ta den un crecemento sumamente positivo y cu Aruba ta e pais cu mas a crece den e region den e ultimo añanan.

E Parlamentario a sigui bisa cu habrimento di e frontera, saliendo di e pandemia, ta un decision cu a tuma corahe y “awe bo ta mira cu nos ta e pais economicamente mas creciente den nos region”.

CAft a raporta cu esaki ta un crecemento di 8 % y cu na 2024 e lo ta rond di 3 %. Esaki ta nifica cu pais Aruba ta bira mas fuerte pa por paga e debenan cu Aruba tin y esaki lo yuda pa economia sigui  crece y bira mas fuerte como pais, a bisa. Segun lider di fraccion di MEP, un di e puntonan cu a keda ariba mesa ta e ‘hoge rentelasten’ y manera Profesor Nicolaï a bisa, e ‘strafrente’ cu Aruba a haya door di un lening di pandemia di COVID di Afl. 916 miyon, di cual un tercera parti a bay den economia pa pone cuminda na mesa di mama y tatanan di famia tempo cu hotel, negoshinan a cera y nan tabata tin cero placa den nan cartera. Cu e ayudo aki, mas di 4 mil famia a haya un entrada chikito cu nan por a mantene cabes ariba awa. Pero manera ta conoci, october a yega y Aruba mester cuminsa paga e debe bek y ta cera un convenio cu Hulanda hayando un ‘strafrente’ di 6.9 %.

Esaki CAft tambe ta remarca, cu e interes aki ta un poco halto y cu lo tin cu purba na baha esaki, Tevreden a indica. For di Parlamento a saca diferente mocion caminda ta indica na gobierno di Aruba cu Parlamento kier pa sigui negocia. Gobierno lo sigui negocia pa haya un miho porcentahe di interes, sea internacional of cu Hulanda mes.

Banda di esaki, e Parlamentarionan ta preparando pa atende IPKO, cu lo tuma lugar na Aruba y lo hiba e punto aki dilanti cu Tweede Kamer, Eerste Kamer, Parlamento di Sint Maarten y di Corsou pa asina por busca tambe un miho interes pa Aruba di parti di e Parlamentarionan. Cada Parlamento por indica e direccion cu nan kier pa nan gobierno cana, Hendrik Trevreden a declara. “Nos ta mira cu tin un posibilidad grandi pa den comienso di aña por tin un bon noticia pa cu Aruba unda cu e interes aki lo baha”, a agrega. E decision pa mantene e autonomia financiero, pa dicidi unda ta inverti como pais y unda ta corta, e decision ey a wordo tuma. “Pasobra si nos a entrega e autonomia financiero ey na Hulanda, januari 2024, sigur Aruba lo a experencia un otro diferente historia”.

Parlamentario Tevreden ta di opinion cu e maneho di e pais aki mester haci’e den un forma holistico, teniendo cuenta cu e hendenan, cu finansa y cu e creditornan internacional. Y no contrario na e deseo di e opositornan di tene na cuenta e aspecto financiero so.

E raportahe di CAft ta e miho raportahe cu Aruba a haya te cu awo y pesey e ta felicita gobierno di Aruba, specialmente Minister Presidente Evelyn Wever-Croes, Minister di Finansas Xiomara Maduro pa e trabao duro cu nan ta bin ta haci desde pandemia te cu awo. Tambe e ta felicita tur otro minister pa haci nan trabaonan na e manera corecto pa por mira awe un raportahe asina positivo y un futuro briyante.

Awo ta keda den espera 1 di januari 2024 cu lo ta hopi fuerte pa pais Aruba. Ta sigur cu lo bay logra baha e interes cu a haya pa e lening di COVID, sea ariba mercado internacional of cu Hulanda mes, na un miho interes di loke a ricibi, a bisa.