SECRETARIO GENERAL DI MEP TA FELICITA TUR ESNAN CU A FINALISA E CURSO DI LIDERAZGO DI FUNDACION FORMACION POLITICO NELSON ORLANDO ODUBER

Diaranson 25 di october 2023, e curso di liderazgo na Cede di MEP a termina cu hopi exito. E curso aki a wordo organisa pa Fundacion Formacion Politico Nelson Oduber (FFPNO) y a dura tres siman y tres biaha pa siman. Remarcabel ta cu mayoria cu a cuminsa e curso a sigui e curso te final. Esaki sigur ta confirma e interes di cada participante, pero specialmente e habilidad y energia di e facilitadora Paula Giraldo pa capta atencion y pone entusiasmo for di principio te final.

Riba e anochi aki, Secretario General y alabes Minister di Enseñansa Endy Croes, a entrega palabranan di felicitacion y encurashamento na tur esnan cu a caba e curso exitosamente. Señor Croes a indica cu ‘Life Long Learning’ ta un pilar den su maneho di enseñansa den Gabinete Wever-Croes II. “Life Long Learning” ta bin di e “Sustainable Development Goals” (SDGs) number 4. Cu esaki Gobierno ta encurasha tur ciudadano di tur edad.

“No laga bo edad stroba bo pa prepara bo mes pa siña cosnan nobo. E curso di liderazgo aki ta un forma pa contribui na mi maneho den gobierno. Partido MEP ta hopi orguyoso pa organisa e programanan bunita asina pa nos comunidad keda educa nan mes mas y prepara nan mes haciendo uzo di e oportunidadnan aki”, Secretario General di Partido MEP a remarca.

Secretario General Croes, den nomber di Partido MEP y Fundacion Formacion Politico Nelson Oduber, a gradici tur participante cu a balora e curso di liderazgo te final y e entusiasmo cu nan a pone. Tambe el a gradici e facilitadora Señora Paula Giraldo, kende den un manera efectivo a duna e curso dirigi riba enseñansa di John Maxual cu un resultado exitoso. Un gradicimento special tambe na su colega di Partido, Señora Michella Steenvoorde-Lacle cu a pusha e proyecto aki.

“E conclusion di e curso ta confirma e poder di liderazgo efectivo. Esaki sigur a resalta con un bon combinacion di contenido interesante y participantenan dedica por crea un ambiente vibrante pa engrandece conocemento. Esaki ta un muestra cu ora conocemento topa cu entusiasmo, resultadonan remarcabel ta desaroya, dirigiendo e participantenan pa desaroya nan ful potencial di liderazgo”, Secretario General a expresa.