Parlamentario Darlaine Guedez-Eramus, Fraccion di MEP: Durante Tripartiet e islanan a pone enfasis riba e importancia pa papia tocante proyectonan cu tin y traha den union cu otro

ORANJESTAD, Aruba 27 di october 2023: E siman aki a tuma lugar un reunion Tripartiet na Sint Maarten entre delegacionnan di Parlamento di Aruba, Curacao y Sint Maarten. E islanan ruman a bini hunto pa asina por trata diferente tematica y cu e enfoke di traha hunto den union riba esakinan.

Parlamentario di Fraccion di MEP, Darlaine Guedez-Erasmus tabata parti di e comision Parlamentario di Aruba cu a atende e reunion Tripartiet.

El a duna di conoce cu e agenda tabata consisti di temanan manera, Geschillenregeling, democratisch deficit, trafico aero entre e islanan, Hub gezondheidzorg, cual a pone hopi enfasis riba salud mental, Belastingstelsel y con como Parlamentario por atende cu e necesidad pa brinda alivio na pobresa.

Guedez-Erasmus a agrega cu cada pais por a duna su punto di bista riba e temanan aki con ta trata esakinan den e pais y preguntanan a bini pa otro con islanan ta haci y con por haci cosnan di diferente manera. Riba e tema con como Parlamento ta atende cu e necesidad pa brinda alivio na pobresa, a bin dilanti e situacion actual di cada isla. “Como Parlamentario mi persona a comparti cu coleganan Parlamentario di Corsou y di Sint Maarten cifranan con Aruba ta atendiendo cu entre otro e salario minimo, pensioen, gezinsuitkering, gehandicaptenuitkering y subsidio pa casnan di FCCA pa personanan cu tin’e mas dificil”, el a declara.

E bunita trabou cu Fundacion Ban Uni Man pa Cria nos Muchanan ta haci pa hopi aña a ilustra cu Aruba tin un banco di cuminda cu ta den man di Fundacion pa nos Comunidad, a bisa. “Tambe mi persona a trece dilanti e parti di educa nos pueblo riba e tereno di maneho di placa. Con importante pa sigui cu programanan educativo, manera e proyecto Finansa den mi Hogar. E proyecto aki ta duna bon formacion y conscientisacion na e famianan cu ta e maneho di placa. E programa aki ta dunando bon fruto cerca famianan na Aruba”, e Parlamentario a indica.

Pesey ta importante pa por tuma proyectonan existente y asina yuda implementa esaki den e islanan ruman. Asina ta gana tempo, por traha riba ehecucion y ta tackle e problemanan mas.

Mi ta contento cu e islanan ta mira e importancia pa papia tocante proyectonan cu tin. Den proximo Tripartiet lo sigui elabora riba e tema aki. Ta importante pa islanan traha den union, den union ta logra hopi mas y sigur por siña di otro”, asina Parlamentario Darlaine Guedez-Erasmus a finalisa bisando.