Minister Dangui Oduber : MINISTER DI TURISMO Y SALUD PUBLICO A REUNI CU UN GRUPO DI SPECIALISTANAN DI SALUBRIDAD DI MEDELLIN, COLOMBIA.
ORANJESTAD- Diahuebs mainta Minister di Turismo & Salud Publico, sr. Dangui Oduber tawata tin e honor pa ricibi un delegacion di un grupo di dokternan y representatenan di diferente hospitalnan y institutonan di Medellin Colombia, encabesa pa Camera di Comercio y HollandHouse Colombia. E bishita di e delegacion di Colombia ta den cuadro di un “trade mission” cu Aruba.
E meta di e bishita di e grupo di specialistanan di Colombia, tawata uno informativo pa asina haña un miho bista ariba con e sector di cuido na Aruba ta organisa.
Temanan di interes cu a ser discuti ta lo siguiente: Minister Oduber a duna un splicacion amplio di nos sistema di seguro di cuido social esta AZV, cual ta basa ariba solidarismo. Tambe a enfoca ariba e plan y vision di Ministerio di Salud pa reenforsa primer liña di cuido na Aruba, ampliacion di specialistanan medico conhuntamente cu cooperacion den regio. Ademas un bista di e AruBIG a ser duna y a enfoce riba Aruba su plan di prevencion y turismo medico.
Minister Dangui Oduber a keda masha contento cu e reunion cu e specialistanan, cu a mustra interes amplio pa intercambia ideanan y experticionan den e area di salud pa asina sigui ofrece un bon calidad di cuido na nos hendenan.
