Minister Glenbert Croes : TA DESEA DPL , DAS Y CURSISTANAN TUR CLASE DI EXITO CU E TRAYECTO PA PROGRESO PERSONAL Y LABORAL
E siman aki ta inicia un proyecto iniciativa di DPL den estrecho cooperacion cu Departamento di Asuntonan Social y Centro di Hoben y Famia, e Trayecto pa Progreso Personal y Laboral.
E meta di e trayecto ta pa inverti den capacitacion di cada participante pa eleva su conocimento pa e por progresa y prospera laboralmente.
Un workshop cu lo tin un duracion di 5 siman cu diferente facilitadornan, cu ta bay enfoca riba preguntanan cardinal manera “ken mi ta, kico mi kier, kico mi por, kico mi ta gusta” pues un retrospecto personal profundo pa yuda e participante descubri su talento y cualidadnan. Pero durante e curso tambe lo instrui e cursistanan riba nan debernan como tambe nan derechonan laboral.
Na final di e curso tur participante lo ricibi un certificado di reconocimento. Pero mas importante cu esaki, e cursista lo culmina e trayecto aki cu un satisfaccion personal enorme.
Pa e mandatario encarga cu Labor, e iniciativa aki ta sumamente importante pasobra manera el a splica: “cu a pesar cu desempleo ta bahando na Aruba, nos kier haci cada empeño pa cualkier persona cu ta buscando y no ta hayando trabou. Nos kier yud’e haya trabou y nos kier yud’e keda cu un trabou. Y nos mester pa nos yiunan di tera ta e protagonista, ta e actornan principal den e progreso economico y progreso laboral di nos Pais.”
Na final di e Trayecto pa Progreso Personal y Laboral, durante cual cursistanan a ricibi training tambe riba con presenta su mes durante un entrevista di trabou, DPL lo percura pa cada un cursista haya entrevista cu mas cu un dunado di trabou. Y Minister Glenbert Croes ta sigur cu danki na e trayecto aki, e cursistanan lo haya y keda cu un trabou tambe.
“Como Minister di Labor, Energia y Integracion mi kier gradici y felicita DPL, DAS y Centro pa Hoben y Famia pa e proyecto aki. Esaki ta un grano mas di empeño den e esfuerso grandi cu nos ta haciendo, pa yuda nos hendenan ta e promenan yama pa ta e beneficiadornan di e progreso economico cu Aruba ta bibando door di percura pa nan haya un trabou pa asina nan por progresa den nan bida.”
