Entrevista di Siman cu Parlamentario Guedez-Erasmus : Ta spera cu e decision di casacion pa loke ta trata e topico di matrimonio di persona di mesun sexo refleha e norma y balornan di e Sociedad Arubiano

ORANJESTAD, Aruba 2 di November 2023: Actualmente, Parlamento ta den proceso cu e ley di matrimonio pa personanan di mesun sexo. Tin un ley di iniciativa cu a wordo entrega na Parlamento y na mesun momento e topico aki ta den casacion, esta si personanan di mesun sexo mester haya e mesun derecho pa por casa. E veredicto di e casacion lo sali den luna di november. Ta spera cu e veredicto aki ta refleha riba e norma y balornan di nos sociedad, paso nos tin cu keda firme para cu e famia ta e curason di un pais.

Nos ta haya nos enseñansa di bida den nos seno familiar. Esey ta e prome lugar cu nos ta pertenece. Famia ta e fuente pa crea entre otro, nos identidad personal y relacional, cu ta keda proyecta den e sociedad. Ta importante pa nos mira e famia como e bienestar general. Si nos mira nos leynan na Aruba, nos tin di bisa cu sigur, e leynan aki ta proteha nos famianan. E famia ta e curason di nos sociedad y nos tin cu proteh’e.

Parlamentario Guedez-Erasmus ta para fuerte riba e hecho cu tin investigacionnan cu a wordo haci cu ora cu e famianan ta lanta stabiel cu e figura di un mama y tata den un bon ambiente na cas esey ta e miho pa e desaroyo pa e mucha. Si sa caba cu e mucha ta lanta miho asina, pakico ta desvia di e figuranan ey?, el a argumenta.

Guedez-Erasmus a subraya cu e ta stima tur persona manera nan ta, pero ta enfatisa cu e ta preocupa pa e implicacionnan cu e legalisacion di e matrimonio entre personanan di mes sexo por tin riba e educacion di nos yiunan, generacion nobo y nos pais.

E debate riba e matrimonio entre personanan di mesun sexo ta sigui ariba mesa den Parlamento, unda cu tur Parlamentario tin e oportunidad pa expresa nan opinionnan y argumentonan riba e asunto. Parlamentario Darlaine Guedez-Erasmus ta spera cu e discusionnan lo ta constructivo y cu por yega na un decision cu ta refleha e norma y balornan di e sociedad Arubiano y cu sigur por mira riba e bienestar general na prome lugar.