Parlamentario Fraccion di MEP, Ricky Hoek: Logronan y elogio pa Prome Minister Wever-Croes durante su bishita di trabou na Hulanda
ORANJESTAD, Aruba 2 di November 2023: Tin un topico cu ta sumamente importante den e dianan aki cual ta e bishita di Prome Minister Evelyn Wever-Croes na Hulanda relaciona cu e asuntonan di pais Aruba, di cual Parlamento ta siguiendo tur e desaroyonan aki di cerca.
Diaranson mainta, Parlamentario di Fraccion di MEP, Ricky Hoek a hiba palabra durante un rueda di prensa y el a expresa cu por a tuma nota cu Prome Minister a biaha pa Hulanda y ta haciendo bishita di trabao na diferente instancia importante. Esakinan ta entre otro Conseho di Minister di Reino, Eerste Kamer, Raad van State y Ministerio di Relacion Exterior.
Hoek a referi na e participacion di Prome Minister na e reunion di Conseho di Minister di Reino. Un di e temanan cu a atende cu ne durante di e reunion tabata esun riba e cambio di LAft y e condicionnan cu Hulanda a trece na mesa ultimo momento.
“Danki pa e bon trabou y pa ta presente na e Rijksministerraad, Minister President Sra. Evelyn Wever-Croes a logra e punto aki caminda cu a convence Rijksministerraad, pa hala e punto di agenda di LAft te cu e siguiente RMR y cu Sra. Alexandra van Huffelen a haya e mandato pa sigui ta na mesa cu gobierno di Aruba”, Hoek a remarca.
E reunion di Prome Minister cu Eerste Kamer caminda cu e mandatario a duna un presentacion di con Aruba ta para awo. A papia di cifranan macro-economico cu ta mustra hopi positivo riba economia, turismo, finansas como tambe desempleo. No obstante e banda positivo, e mandatario a trece dilanti tres punto di preocupacion cu ta entre otro: 1) e hecho cu no ta tur famia ta sinti e progreso ainda pasobra tin famianan mester traha 2 of 3 trabou 2) E interes halto di 6.9% cu Hulanda 3) Jaarrekening cu atraso.
Prome Minister a splica si kico Gobierno ta haciendo riba cada un punto. E miembronan di Eerste Kamer a haci varios pregunta riba e tres topiconan y nan tabata tin palabra di elogio pa Aruba. Prome Minister a logra tambe via di Ministerio di Relacion Exterior, cu Hulanda lo asisti Aruba riba implementacion di dos tratado. Esakinan ta e Tratado di Istambul, cu ta frena violencia contra hende muher y e Tratado contra secuestro di mucha. Ambos ta hopi importante y Gobierno di Aruba kier implementa nan mas pronto posibel.
Por ultimo e bishita di Prome Minister na Raad van State y e despedida di Sra. Milly Schwengle como representante di Aruba den Raad van State. Parlamento di Aruba, specialmente fraccion di MEP ta gradici Sra. Schwengle pa e sublime trabounan desplega den Raad van State durante su termino di 6 aña. Hoek a finalisa bisando cu Parlamento di Aruba ta sumamente contento cu tur e logronan di Prome Minister Wever-Croes. Pasobra, esaki ta loke a propone na Prome Minister den e ultimo reunionnan den Parlamento, cu Parlamento di Aruba ta desea pa gobierno sigui negocia pa loke ta trata e prestamonan, e condicionnan y e interes di e pago cu pais Aruba a haya for di Hulanda.
